In Gottes nome Amen wen alle dinckh zu der kenne und zu lobn sind peym end wen ein gutz end das macht volkome ein
werck darumb ich Jorig Sneyder purg(er) zu znoym am obermarkt gesessen hab aygenchlich betracht wie ich mocht
furdpringen und d(er)fullen die guten werck die ich leicht layder v(er)saumpt hab in meim lebn mit eim vornunftigen
gescheft an meim lecztn zaiten und hab in gote vankunne an dem todpet doch pey gut(er) v(er)nunft und nach rat
mein(er) gegenburtichait d(er) erbn leut hainreichs chinfner die weil purg(er)maist(er) und chunz chrausen die zeit schepfe
zu znoym mein lecztes gescheft getan und gemacht als mir d(er) almechtig got ein gegebn hat In der mass ich schaff
zum esten mol zehen mark grosser zu sand nicolas zum paw daselbs zu znoym ich schaff auch drey mark zum
heylign chreuz zupessern dye glas und die gwelib Ich schaff auch zu uns(er) lieven frawen hye zu znoym am mark
grosser und das gelt aus zerichttn in den esten zwain Jaren als d(er) prieff gebn ist Ich schaff auch zwen chelch
ain zu uns(er) liebn frawen und ain zu dem heilign chreuz in der obgenantn stat und die genantn zwen chelch aus
zerichttn wen sy mein haussfraw anna vospringen mag Ich schaff auch und main das stetichlich also das das vol
pracht werd das die genant mein haussfraw anna sechs mensch in der fasten all sinitag zu haws habn schol
die weil die egenant mein haussfraw anna lebt Ich schaff auch den selbign sechs menschn yesleichem sechsthalb
elln gemayne tuchs und das aus zerichttn von dem erb ze thewrmli alle Jar ierlich die weil sy lebt und nach
ierm tod schol das genant almuesen ab sein Ich schaff auch meim liewen vetln Johannes auff meim haus
am obmarkt zu naest pey d(er) blassken sun gelegn sechs mark grosser ob er recht und ein priest(er) werden
wil und was des vbrigen ist haus und hoff ackher und weingarten und darzu was in haus und in hoff
ist es sey wenig od(er) fil wye das genant ist das schaff ich mein liewn egenantn haussfrawen anna domit
ze tun und zu lassen zu irn nucz und frum wie sy wil und ditz gescheft aus zerichttn alzemal das empfilch
gancz und gar den erbn egenantn zwain manne an irn trewn domit zu tun und zu lassen nach allem
irn willen was se mier gut wedunket sein des alles zu eim waren gezeugnus ist das Infigel d(er) stat
zu znoym an disen gescheftprieff gehangen der gebn ist nach christi gepurd Tausend Jar drew hundert
Jar und darnach in dem acht und Newnczigsten Jar des mitichens in den hagsten quatembern nach pfingstn