Wir Sigmund von gotes gnaden Romischer kunig zu allen zeiten merer des Reichs vnd ze Vngern ze Behem Dalmacien Croacien (et)c(etera) kunige Vnd wir Albrecht
von denselben gnaden hertzog ze Osterreich ze Steir ze kernden vnd ze krain Graue ze Tyrol (et)c(etera) Bekennen vnd tun kund offenwar mit disem brief allen den die In sehent oder
horent lesen Seidemal vns der Allmechtig got von seinen gnaden vnd gotlicher schickung vil vnd manigen landen furgeseczt vnd furgefaßt hat So sein wir genaigt
vnd phlichtig daz wir die also versorgen vnd verwesen daz all vns vndertan frides Ru vnd des Rechten vnder vnsern flugen geniessen vnd daz Si in ainem geruleichen wesen
desteipas mugen vor den Allmechtigen fur vns bitten Wan nu zwischen dem Erwirdigen geistleichen Johan Abbt vnd seinem Conuent des klosters zu Pruk vnder
Znoim gelegen an ainem vnd dem Burgmaister Rat vnd Burgern gemainlich der Stat zu Znoim vnsern lieben getrewen an dem and(er)n taile spenne vnd stoss auferstand(e)n
sind von ettleicher dinge wegen darau der vorgen(ant) Abbt vnd Conuent mainten recht zehaben nemlich von des weinzehents wegen den der Abbt von alter her vmb Znoim
genießnet hat da weisser vnd roter wein wechst vnd die burger von Znoim sich des entseczt habent vnd mainten Si weren nicht phlichtig von Rotem wein zehent zegeben
Wan aber der vorgen(ant) Abbt an seins selbs seins klosters vnd Conuents stat vnd auch die burger zu Znoim der Sachen bei vns beliben vnd dar tgenzleich hinder vns traten sind
also was wir darumb sprachen daz Si das baiderseit stet halten vnd volfuren wellen darumb mit wolbedachtem mut vnd mit guter vorbetrachtung vnser Rete haben wir auz
gesprochen vnd sprechen auch wissentleich mit kraft ditz briefs Seidemal die burger ze Znoim anhellig sind daz Si dem egenan(ten) Abbt sein Gothaus vnd Conuent von
weissem wein gezehent habent vnd nicht sunder freihait noch brief habent daz Si von Rotem wein nicht zehent geben sullen daz Si denn nu hinfur demselben Abbt seinem
Gothaus vnd Conuent vnd iren Nachkomen bei demselben Gothaus zehent raichen vnd geben sullen an widerred von allen weinen es sei Roter oder weisser wein die In
wachsent an solichen gepirgen vnd steten da Si dem egenan(ten) Abbt vnd dem Conuent vormaln gezehent habent antgeuer Denn von der waid wegen Im prulfelde
vischerey wald holtz vnd waiden vnd vmb ander sachen darumb Si miteinande(r) zwavig vnd stossig sind Sprechen wir daz dieselben sachen all in guten angesteen sull(e)n
vntz auf vnser frawn tag zu der liechtmess schierest kunftig seidemal notdurft ist daz wir baider tail brief vnd kuntschaft die Si darumb habent aigenleicher verhorn
solten des wir aber dizmals von vnmuss wegen nicht getun mochten vnd wan wir egenant(er) kunig Sigmund dieselben Sachen in der zeit mit dem egenan(ten) vns(er)m Sun
hertzog Albrechten selber villeicht nicht vhoren mugen haben wir demselben hertzog Albrechten vns(er)m Sun enpholhen daz er In baider seitt in derselben zeit ainen tag fur
sich beschaide vnd Si vnd auch all solich brief vnd kuntschaft aigenleich verhore vnd darnach zwischen In auzsprech wes sich vetweder tail halten sulle Vnd des zu
vrkund haben wir den brief mit vnser baider anhangenden Insigeln vsigelt Geben zu der plintenpurg Nach cristi gepurd vierzehenhundert Jar vnd darnach in dem
dreyvndzwaintzigsten an eytag nach Sant matheus des heiligen zwelfpoten tag vnser kunig Sigmunds Reichs des vngrischen (et)c(etera) in dem Siben vnd dreissigsten
des Romischen in dem vierzehent(e)n vnd des behemischen in dem vierden Jaren