Wir friderich von Gots gnaden Burgraffe czu Nůremberg Bekennen vnd tůn kunt offenlichen mit disem briue allen den die in sehen horen oder lesin das czwisschen dem allerdurchluchtigisten fursten vnsim lieben gnedigin herren her
kareln Romisschen keyser zu allen czeiten merer des Reichs vnd kůnig zu Behem vnd vns ein fruntschaft vnd ein rechte ee geredet vnd geteidinget ist also hernach geschriben stet Also daz der egenante vnser gnediger herre sein
tochter die er nehste elichen gewinnet in den nehsten funff Jaren die sich anhebende sint vff disen hutigen tag sol geben vnsim Sone den wir nehste elichen gewinnet auch in disen nehsten funff Jaren zu eime elichen weibe
vnd wir denselben vnsin Son wider sullen geben derselben seiner tochter zu eime elichen manne Also daz wir dieselben vnsir kinder zulegen sullen vnd wollin wann vnser Son sollichis alte Jar alt ist ein vierteil Jaris vor oder
nach an alles verziehen vnd angenuerde Da wir beiderseit mit guten truwen gelobt haben vnd des zu den heiligen gesworen Also daz der egenante vnser herre sein erben oder nachkomen sullen vnd wollin geben derselben sein tochter
vnserm Sone irin eiden oder vormunden Czehentausent Schock behemischer grozzen zu heimspewer vnd zugelte die er ir beweist geschicket vnd vermacht hat vff den vesten steten vnd merckten Aurbach Eschenbach hartenstein
Stralenfeld vnd vff dem marckte velden mit allen leuten dorffern guten gulten czinsen dinsten eren vnd den rechten gerichten mit allen irin zugehorungen wo daz gelegen oder wie es genant sey besucht vnd vnbesucht nichtes
vzgenomen als er vnd sein vordern die herbraht haben an alles geuerde Also daz vnser egenanter herre sein erben oder nachkome die egenan Summe geltes bezallen vnd geben sullen vnuerzogelich halbes in dem ersten Jar des bey
lagers vnd in dem andern Jare dornach nehste daz ander halbe teil des egenante geltes geschehe aber der bezallunge nicht also als vorgeschriben stet so sol dann sein tochter vnser Snur vnd ir vormunde dann die egenan vesten stete
vnd merckte innehaben nutzen vnd niessen an allen abeslage als lange vntz vnser herre der keyser sein erben oder nachkome die erledigen vnd erlosen vmb die egenan Czehentausent schocke behemischer grozze prager muntze
oder vmb emutze vnd weringe dafur als zu Nůremberg oder in dem lande darumb genge vnd gebe ist der losunge er vnd sein erben oder nachkome alle Jar maht vnd gewalt haben welchis czeit sy komen in dem Jare Vnd sullen
auch wir vnser erben oder nachkome in der losunge gestaten vnd auch gehorsam sein an widerrede vnd angeuerde Vnd wenn er oder sein erben also losen wollen So sullen wir vnser erben oder nachkomen dann dasselbe gelt wider
anlegen an nutzeliche guter in dem lande zu francken oder vff den Gebirge nach vnser beider frunde Rat doran sein tochter vnd vnser Sone ir gelt sollichlichen gehaben muge angelide Vnd vff daz egenante gelt hat sich sein
tochter vnd vnser Son verziehen vnd czeihen auch sich mit kraft dicz briues aller vorderung vnd anspruche zu allin seime lande leuten herschaften manlehen vnd zu allem erbe ez sey lehen oder eigen wie daz genant ist
wo ez gelegen ist daz sie furbas ewigelich nymermer dornach reden vnd sprechen sullen noch deheinerley recht doran haben angeuerde Auch sullen wir vnd vnser erben auch wider geben vnd vermachen seiner tochter zu widerlegug
ir heimspewer Czehentausent schocke behemischer grozzen zu den Czehentausent schocken die ir vor vmarchet sein Also daz der Summe aller wirt Czwentzig tausent schock grozzer die wir vnsin kinden beiderseit also geben habin die
beweisen schicken vnd machen wir daz egenan vnsers herren tochter vnsim Sone irin erben vnd vormunden vff den nachgeschribn vesten steten vnd merckten vff der vesten Rosenberg wunsidel der stat vff der weyzenstat vnd vff
den vesten Rudolffstein vnd Ekebechtstein mit allen leuten dorffern guten gulten czinsen dinsten eren wolden rechten gerichten mit aller zugehorunge nichtes vzgenome besucht vnd vnbesucht wo daz gelegen oder wie es genant ist
an alles geuerde Ouch sullen wir vnser erben vnd nachkome der egenante vnsis herren tochter nichten beweisen vnd machen ir morgengabe nach des landes zu francken recht sitte vnd gewonheit vnd ir auch dafur besunder gute
pfantschaft ensetzen vnd engeben als des landes zu francken recht vnd gewonheit ist vnd bey dem gelte allen vnd der pfantschafte sullen vnser egenan kinder beiderseit ir beider lebetag geniclichen pleiben vnd sitzen an alles hindern
vnd angeuerde Vnd wie sache daz ir eins abeginge welchis daz wre vor dem andern vnd erben mit dem andern nach im liesse Welchis dann lebendig beleibet daz sol dann sein lebetag bey den egenan vesten steten merckten guten
vnd bey aller pfantschaft geniclichen sitzen vnd pleiben nutzen vnd niessen an alles hindern fur die egenan Summe Czwentzig tausent schocke behemischer grozzen vnd nach des tode sol es geuallen vff ir beider erbin ob die lebendig
pleibn Auch ist geredet ob ir eins abgienge nach der czeit als sie bey geslaffen haben Welches daz wre vnd nicht erben nach im liesse mit dem andern so sol daz daz dann lebendig pleibet bey den egenante vesten stete merckte
guten vnd aller pfantschaft als vorgeschriben stet auch sein lebetag geniclichen beleiben sitzen vnd die nutzen niessen vnd innehaben vnd nach desselben tode so sol yeglichs teil gutis geltes vnd erbes wie vnd von wann daz
darkomen were wider hinder sich geuallen an die nehsten erben danne ez herkomen ist an alles vziehen hindernisse vnd angeuerde Vzgenome ir morgengabe do mit sie tun sol vnd mag die schicken gebn vnd emachen wir
vnd wem sy wil bei irim leben oder an irem tottbette an alles hindern vnser vnser erben vnd nachkome als morgengabe recht sitte vnd gewonheit ist in dem lande zu francken an alles geuerde Ouch ist geredet wre daz vnß
Son den wir nehst gewinnet abgienge vor dem beiliger als vorgeschribn stet des Got nicht enwolle vnd vns got eins andern Sones beriete von seime gnaden in disen funff Jaren so sullen wir vnser erben vnd nachkomen
aber denselben vnsirn Son seiner tochter geben die er nehst gewinnet zu eime elichen manne vnd er dieselben tochter wider vnsim Sone zu eime elichen weibe Wer auch daz vnsis Sones tochter abgienge in der czeit ee daz beileger
geschehen ist vnd im got aber ein tochter gebe in disen egenan funff Jaren so sol der egenan vnser herre sein erben oder nachkomen die selben sein tochter auch wider geben denselben vnsin Sone zu eime elichen weibe mit allen
rechten gedingen punden teidingen vnd artickeln als vor vnd hernach geschribn stet an alles geuerde Oder ist geredet worden Wer auch sache daz wir ee eime Son eliche gewinne in disen funff Jaren dann vnser egenan herre
der keyser ein tochter So sol derselbe vnser Son dieselben funff Jar die sich als heut anhebend sein warten vnsis herren tochter ob im die got gebe in denselben funff Jaren Wer aber daz vnser herre nicht eliche tochter gewinne
in den funff Jaren so mugen wir vnsin Son nach denselben funff Jaren verlobn vßheyraten vnd da mit tun waz wir wollen angeuerde Ouch sullen vnd mugen wir alle vnser erben vnd nachkomen alle vnse pfantschaf
die wir gesatzt haben wider losen wann wir wollen vnd dasselbe gelt sol man dann anlegen nach vnser beider frunde Rat vnsin kinden beidin an nutzliche guter doran sy irs geltes wol habend sein an alles geuerde Vnd
des haben vnd sullen alle Amptleute vnd burger der egenan vesten stete vnd merckten von beidenteylen mit guten truwen gelobt vnd zu den heiligen geserte eide gesworen ob ez zuschulden kome als vor vnd hernach ge
schriben stet daz stete vnd veste zu halden vnd zu furen vnd da wider nymmer getun mit worten noch mit wercken in keyne weis als vor vnd hernach geschriben stet an alles geuerde Es slaueh kein Amptma der
vorgenante vesten stete vnd merckte uff beidenteylen sich nicht lazen entsetzen Ez sey dann daz der dem man dann setzende wirt der gehuldet habe vnd zu den heiligen gesworen als der vorder getan hat vnd als vor
vnd hernach geschriben stet Wer auch daz der Amptleute der obgenanten vesten stete vnd merckte ist abgienge von todes wegen von welchem teil daz were Wenn man dann setzen wil an des abgangen stat der sol
auch vor gelobet gehuldet vnd gesworen habe als der vorder getan hat vnd als vorgeschribn stet angeuerde cze vrkunde dicz briues versigelt mit vnserm Grozzen anhangendem Jnsigel Der geben ist zu Nůre
berg nach Cristus geburde Dritzehenhundert Jar dornach in dem Ahte vnd Sechtzigistem Jare an dem nehsten freitag vor der vasenahte