Wir Bolke von gotes gnaden herzoge von Slesien vnd herre zu Munsterberg bekennen vnd tun kunt offenlich mit desem briefe allen den die yn sehen adir horen lesen Wann
der allirdurchluchtigste furste vnd herre her Karl Romischer keys(er) zu allen zeiten merer des Reiches vnd kunig zu Behem vnser lieber gnedig(er) herre fur sich als eynen kunig zu
Behem der durchluchtige furste vnd herre her Wenczla sin Sun kunig zu Behem ire erben vnd nochkumen kunige zu Behem von wegen der wirdigen krone des selben kunig
reichs vns gnediclichen vnd bescheidenlich abgericht(et) vnd abegeleget haben vmb allen den anefal des wir gewartet haben vff die lant selig(er) gedechtnisse des hochgebornen fur
sten herren Bolken etwenne herzogen zu der Sweidnicz vnd zu deme Jawor vns(er)s lieben vettern vnd haben vns so gnediclich ab gewyset das vns dor an wol vnd genglichen ge
nuget do von mit wolbedochtem mute mit rate vnser frunde vnd vnser getrewen vndirtanen vnbetwungen mit gutem willen vnd mit rechtir wissen so haben wir vns vor
vns vnser erben vnd nochkumen ewiclich vorzigen vnd vorzeihen vns alles rechten ansprache anredunge vnd allir zukorsicht die wir bey namen zu den herzogtumen zu der
Sweidnicz vnd zu deme Jawor vnd zu allen andirn landen leuten steten herscheften vnd besiczungen des egenant(en) vns(er)s vettern gehabet haben odir in dheine weis gehaben moch
ten wie man die benennen mag mit sintlichen worten vnd wie wol das sey das wir deme egenant(en) vns(er)m gnedigen herren als eime kunige zu Behem eyngeben vnd ingeant
wortit haben alle vnser hantfesten briefe vnd kuntschaft do mitte wir mochten odir meinten die egenant(en) furstentume lant vnd leute anczureden vnd anczusprechen in
dheinen weis doch durch merer sicherheit vnd vff die rede das der egenant(e) vnser herre als ein kunig zu Behem der durchluchtige furste herre Wenczla sin Sun kunig zu Be
hem ire erben vnd nochkumen kunige zu Behem vnsern gnedigen naturlichen herren das kunigriche vnd die krone zu Behem gesichert werden So ist vnser meynunge vnd
wollen das genglich vnd mit rechtir wissen Sey das sache das ymm(er) in dheinen zukumftigen zeiten sulche hantfesten briefe kuntschaft vnde beweisunge do mitte wir vnser er
ben vnd nochkumen die egenant(en) furstentume lande leute vnd herschefte anreden ansprechen odir fordern mochten in dheine weis zu liechte quemen odir furbracht wur
den das denne die selben hantfesten briefe kuntschaft vnd beweisungen vntuglich vnkrefte vnd vornichtet sin sullen Also das sie vns vnd vnsern erben keinen fromen vnd
deme egenant(en) vns(er)m gnedigen herren als eime kunige zu Behem deme durchluchtigen fursten herren Wenczla kunig zu Behem iren erben vnd nochkumen kunig(en) zu Behem
deme kunigriche vnd der kronen zu Behem ewiclich keinen schaden bringen des haben wir gebeten den hochgebornen fursten hern Rudolff herzogen zu Sachsen des heiligen Rey
ches Erczmarschalk vnd die erwirdigen herrn in gote hern Johansen Erczbischoff zu Praga des bebstlichen stules legaten hern Johansen byschoff zu Olomucz des egen(anten) vnsers
herren Canczler hern Petir byschoff zu deme leutmuschel hern Johansen probst zu wyschegrade Canczler des kunigrichs zu Behem vnde die hochgebornen fursten Bolken her
zog(en) zu Oppul vnd Heynrich herzog(en) zu deme Brige das sie geczug(en) seyn wollen aller der egenant(en) sachen vnd ire Ingesigele an desen brieff hengen Vnd wir Rudolff herzo
ge zu Sachsen Johannis Erczbischoff zu Praga Johannis byschoff zu Olomucz Petir byschoff zu deme leutmuschel Johannis probst zu wyschegrade Bolko herzoge zu
Oppul vnd Heynrich herzoge zu deme Brige wir vorgenant(en) bekennen vnd tun kunt offenlich allen den die desen brieff horen lesen das wir durch sunderliche fruntliche
bete des egenanten hochgebornen fursten hern Bolken herzog(en) von Slesien vnde herren von Munsterberg zu ewigem gedechtnisse aller der egenant(en) sachen disen brieff
mitsampt im vorsigilt haben der gegeben ist zu Prage an deme nehesten mantage vor vnser lyeben frawen tage lyechtmessen Noch Cristus geburt Tausent
Dryhundert Jar in deme Sebenzugsten Jare