Wir Erhart fridrich vnd poab gebruder genant die sparnecker Bechennen vnd tun chunt offenlich mit
disem briefe allen den di in sehen oder horen lesen Daz wir mit wolbedachtem mute vnd mit Rate vnser
mage vnd frunde recht vnd redlich fur vns vnser Erben vnd nachkomen verkaufft haben dem Allerdurch
leuchtigsten fursten vnd herren hern karly Romischem keyser zu Allen zeiten merer des Reichs vnd kunge
zu Behem vnserm liben genedigen herren Als einem kunge zu Behem seinen Erben vnd nachkomen kungen
zu Behem dem kunigreich vnd der kronen des selben kunigreichs zu Behem di nachgeschriben gute mit
namen vnsern halben teil An dem Marckt zum schonnbach vnd Alle Ander vnser gute di etwene vnß vater
seliger vmb den Abt vnd conuent des closters zu waldsassen gekaufft hat mit gerichten zinsen zins
lewten welden Buschen wisen wayden Eckern teichen vischerey vnd mit Aller czu gehorungen wie die
genant sein oder man di Bennen mag mit sunderleichen worten vmb virdhalbtusent guldein da wir von
dem obgenanten vnserm herren dem keyser genzlich gericht vnd bezalt sein vnd geloben mit gute trewen
An geuerde fur vns vnd vnser Erben dem egenanten vnserm genedigen herren Als einem kunig zu Behe(m)
seinen Erben vnd nachkomen kungen zu Behem vnd der kronen des selben kunigreichs zu Behem daz
wir in Allen vnd ir icleichem besunder di obgenanten gute mit Allen iren zugehorungen Als da ob be
griffen ist entwaren schirmen vnd vertretten wullen gein Allermenleich die sie dar vmb Anreden
Ansprechen vnd beteydingen wolten mit dem rechten noch recht vnd gewonheit der lande Des hat vns
Gebrudern von sparnecke vorgenant vnser genediger herr der keyser Als ein kung zu Behem An de(m)
selben kauffe gegeben die nachgeschriben gute die vesten sparnecke vnd seinen dritteil An der stat zu
Munichberg mit Allen rechten nuczen velden vnd zu gehorungen Als er di gekaufft hat von dem edeln
Chunrad von Neyperg Als daz wir vorgenanten gebruder vnd vnser Erben mannes geslechte die
selben vesten sparneck vnd das dritteil zu Munichberg zu rechtem lehen von dem obgenanten herren
hern karle Als von einem kunge zu Behem seinen Erben vnd nachkomen kungen zu Behem vnd der
kronen des selben kunigreichs zu Behem czu lehen haben schullen Als wir Auch dem egenanten vnserm
gnedigen herren dem keyser Als einem kung czu Behem seinen Erben vnd nachkomen kungen zu Behem
vnd der kronen des selben kunigreichs zu Behem fur vns vnser Erben vnd nachkomen ewicleich ge
huldet gelobt vnd czu den heiligen leipleich gesworn haben das wir in Als vnsern rechten naturleichen
vnd ordenleichen herren getrew gehorsam dinstig vnd vndertanig sein schullen vnd wollen Als lehen
manne irn lehenherren czu rechte pflichtig seint vnd dar zu geloben wir in mit guten trewen An ge
leichem besunder Als vnser rechter naturleicher herschafft vnd irn Amptlewten di selben vesten sparneck
vnd das dritteil der egenanten stat zu Munichberg schullen ewicleichen offen sein zu Allen iren not
durfften vnd geschefften Als offt si des bedurffen werden vnd schullen Auch in do mit getrewleichen
warten drey vnd Auch gehorsam sein wider Allermenleich niemant Ausgenomen An vrkunde
disz briefs der mit vnsern Anhangenden Ingesigeln versigelt ist der geben ist do man zalt von crists
geburt dreuczehenhundert Iar dar nach in dem Sibenzigsten Iar An sande valentini tage