Wir der purgermaister der Rat vnd die purger gemainlich der Stat zu Nördlingen bekennen vnd tuen kunt offenlich mit disem briene allen den
die in sehent hörent oder lesent daz wir mit wolbedachtem mut vnd mit rechter wissen ze eren ze dienst vnd ze liebhabn dez heiligen Römischen Richs
vns vnser erben vnd nachkomen gemainlichen mit dem durchleuchtigen fürsten vnd herren herrn Wenczeslaw künig zu Behem sinen erben vnd nachkomen
künigen zu Behem verbünden haben vnd verbinden In solicher geschefft vnd mainung als hernach geschribn stet also beschaidenlich daz wir Im gelobt
haben vnd geloben mit guten truwen one geuerd wer daz der allerdurchleuchtigest fürst vnd herr herr Karl Römischer kayser zu allen zeiten merer dez
Richs vnd künig ze Behem vnser lieber gnediger herr sin vatter stürbe Ja got lang vor sy daz denne wir vnd vnser erben vnd nachkomen dem egnan
ten künig Wenczeslaw sinen erben vnd nachkomen künigen ze Behem willeclich vnd gütlich by gestandig vnd beholffen sin wellen vnd süllen wider
allermenglich die sie In iren landen lüten rechten guten gewonhaiten fryhaiten gnaden vnd nuczen disseit dez Behemischen waldes iendert gescheden
getren oder mit gewalt bekrenken in dehaim wisz vnd die selben hilff süllen vnd wellen wir tün nach dem als Im not wirt mit vnser vermügen on
geuerd vntz an ainen künftigen aintrechtigen Römischen künig der von allen kürfürsten oder von dem meren tail erwelt wirdet vnd wenn daz geschiht
so süllen alle die egnanten pündtnuss gelübde vnd hilff ab sin vnd dez zu gutem vrkund geben wir disen brief versigelten mit vnser Stat anhangendem
insigel der geben ist an sant Georien tag do man zalt von christes geburt dreuczehenhundert iar vnd in dem Sibenczigosten Jare