Wir Johans von gotes gnaden Marggraff zu Merhern vnd wir Jost desselben hochgebornen fursten h(er)rn Johansen vnsers herren Erstgeborner Sun /
von gotes gnaden Marggraff vnd herre des landes zu Merhern Bekennen vnd tun kunt offenlich mit disem briefe allen den die in sehen oder horen
lesen daz wir mit wolbedachtem mute / mit rate vnser getrewen vnd mit rechter wissen fur vns vnser Erben vnd nachkomen Marggrauen zu
Merhern ewiclichen dem allerdurchleuchtigsten fursten vnd herren h(er)rn karle Romischem keisere zu allen zeiten Merer des Reichs vnd kunige
zu Beheim vnd dem hochgebornen fursten h(er)rn Wenczlawen kunige zu Beheim Marggrauen zu Brandemburg vnd herczogen zu Slesien vnsern lie=
ben h(er)rn bruder vnd vetter / iren Erben vnd nachkomen kunigen zu Beheim globet haben vnd globen ouch mit guten trewen an geuerde / Sey
daz sache daz sie ir kunigreich furstentum herschaffte leute oder lant / von wegen des durchleuchtigen fursten h(er)rn Ludwige kuniges zu
vngern seiner erben oder nachkomen kunige zu vngern oder von wegen desselben kunigreichs zu vngern dheinerlei angriff not oder leidinge
angreen wurde in dheineweis daz denne wir die obgen(anten) Johans vnd Jost sein Erstgeborner Sun Marggrauen vnd herren des landes zu Merhern
vnser erben vnd nachkomen Marggrauen vnd herren des landes zu Merhern die in zeiten werden vn(d) wider denselben kunig von vngern seine
erben vnd nachkomen kunige zu vngern ir helfer diener / lewte vnd lant / beigestendig / geraten vnd geholffen sein wollen vnd sullen mit
allem vnsern vermugen / als offt des not tut / in guten trewen vnd an alles geuerde / Ouch globen wir die egen(anten) Johans vnd Jost Marggra=
uen vnd h(er)rn des landes zu Merhern fur vns vnser erben vnd nachkomen Marggrauen vnd h(er)rn des landes zu Merhern mit guten trewen an
alles geuerde daz wir mit dem egen(anten) kunige vnd andern kunigen zu vngern die hernach kunftig werden mochten / nymer dheine buntnusse
machen oder tun sullen oder wollen in dheineweis mit briefen oder sust mit dem munde Es sey denne daz wir vnsern h(er)rn h(er)rn karl h(er)rn Wencz=
lawen seinen Sun / ire erben vnd nachkomen kunige zu Beheim vnd daz kunigreich zu Beheim vor allen sachen ee vznemen vnd vzgenumen
haben / an vrkunt ditz briefs versigelt mit vnsern beider angehangenden grossen Insigeln der geben ist zu Bresslaw nach crists geburt dreizen=
hundert Jar darnach in dem czwei vnd sibenzigisten Jare / an dem nehsten Sontage nach sent dorotheen tage der heiligen Juncfrawen