Wir heinrich der Junge vogt von Gera fur vns heinrich den Eltern vogt zu Gera vnsern vater vnd
alle vnse bedir Erben bekennen vnd tunkunt offenlich mit diesem briefe allen den die yn sehent oder
horent lesen das der Erber wise man Jostel Rotlew ammtmeister vff dem Berge zu den Chutten von
geheisses vnd gebotes wegen des allerdurchluchtigsten fursten vnd herren herrn karls Romischen keiser
zu allen zeiten merers des Reiches vnd kunigs zu Beheim vns bezalt vnd gentzlich verrichtet hat
viertzehenhundirt schok grossen pragischer pfenninge fur die vesten blankenburg vnd ir zugeho=
rung die wir dem egenan(ten) vnsirm herren dem keiser kunig Wenczlawen seinem Sune vnd iren Erben
erblich vorkaufft haben vnd Sechs hundirt schok grosser die vns der egenan(te) vnser herre der keiser
gelihen hat dorumb wir vnsir vesten lobenstein mit iren zugehorungen von ym als einem ku=
nige zu Beheim vnd der Cronen des kunigreichs zu Beheim zu lehen haben sullen als leuterlich vswi=
sen vnser brieue die wir ym vnd seinem Sun kunig Wenczlawen vber lobenstein vnd blanken=
burg vormals gegeben haben vnd douon so sagen vnd machen wir von des egenan(ten) vnsirs vatirs
vnsir vnd vnsir Erben wegen mit rechter wissen den egenan(ten) vnsirn herren den keiser als einen ku=
nig zu Beheim kunig Wenczlawen seinen Sun ire Erben vnd Nachkomen kunige zu Beheim vnd
die Crone desselbin kunigreichs derselbin Summe geltes zwey tausent schok der egenan(ten) gro
ssin gentzlichen vnd gar quyt ledig vnd loz vnd haben des zu vrkunde vnsir Jngesigel an
diesen brieff lassen hengen der geben ist zu Eger Noch Cristes geburte dreizehenhundirt Jar dor
nach in dem zweyvndsibenzigsten Jare des Sontags misericordia domini