Wir Rudolff Graue zu Hohemb(er)g bekennen offenlich mit urkund ditz briefs wann unse(re) alden und vorfaren Grauen zu Hohemb(er)g zu alten zeiten die vesten und burg Rofaneck
gehabt und besessen habent zu rechtem lehen von den durchleuchtigen fursten und herren kungen zu Beheim dem kunigreich und der crone desselben kunigrichs zu
Beheim Und dieselben unse(re) alden und vorfarn den die vorgenanten burg und vesten empfremdet und verkauffet habent von der graffschaft von Hohemb(er)g Und wir nicht
wollen daz die vorgenanten unse(re) herren kunige zu Beheim an der wille und gunst und wissentnuzz des kauffs und die empfremdung geschehen sin ir lehenschaft
verliesen da ir ouch abgen sullen durch daz sie in von uns wider leget werden als billich und muglich ist Und wir ouch schuldig und pflichtig sein zu tun
davon mit wolbedachtem mute rate unse(re) frunde Und mit rechtem wissen zu widerlegunge der vorgenanten lehenschaft So habn wir unse(re) stat fridingen und
disew dörffer kollingen Egensheim Und tiengwisshusen die unse(re) aigen sind mit allen rechten und zu gehorungen wie man die benemen mag dem allerdurch
leuchtigsten fursten und herren h(er)n karly Romischem keiser zu allen zeiten mere(re) des richs und kunig zu Beheim unserm liebn gnädigen h(er)n als eim kunige
zu Beheim von wegen des durchleuchtigen fursten und herren h(er)n Wenczlaw eim kunige zu Beheim sines sunes unsers liebn gnädigen h(er)n uffgelazzen uff
gerichtet Und ouch lediclich uffge(be)n ufflazzen uffrichten Und ouch lediclich uffge(be)n habn an disem gegenwurtigen brief Und wann derselbe unse(re) h(er)re d(er) keiser
als ein kunige zu Beheim von siner und des egenanten unsers h(er)rn aigen h(er)n Wenczlaw sines sunes kuniges zu Beheim von besundern gnaden uns graue
Rudolffen von Hohemb(er)g vorgenanten durch unse(re) flehe bete die vorgenanten stat fridingen Und die obgenanten dörffer kollingen Egensheim und tieng
wisshusen mit irer zu gehorungen gnädiclich gelihen hat und wir im ouch daruber als ein man sinem rechten lehenh(er)rn von recht wegen schuldig und pflich
tig ist zu tunde gewonlich huldunge eyde und gelubt getan habn davon gelobn wir in guten truwen an w(er)des stat fur uns unse(re) erbn und nachkom(en)
und Grauen zu Hohemb(er)g daz wir ewenclich ir vorgenanten stat fridingen Und die obgenanten dörffer kollingen Egensheim Und tiengwisshusen
Und waz darzu gehöret von dem egenanten unserm h(er)rn dem keiser als eim kunige zu Beheim kunige Wenczlaw sinem sune iren erbn und nach
kom(en) und kunigen zu Beheim dem kunigreich und der crone desselben kunigrichs zu rechtem lehen nemen und enpfahen sullen und wellen an allerslay
widerrat und hindernuzz Und ouch des von hulden gelobn und swern Und ouch alles daz da von tun sullen und wellen daz von recht und gewonheit
lehenlewte schuldig und pflichtig sin zu tun iren rechten naturlichen lehenherren Und des zu urkund habn wir fur uns unse(re) erbn und nachkom(en)
und Grauen zu Hohemb(er)g unse(re) aigen insigel offenlich gehenckt an disen brief Und durch mer(er) sicherheit willen sulch(er) sachen habn wir gebeten
den hochgebornen fursten und h(er)rn h(er)rn Wenczlaw hertzogen zu sachsen und zu lunemburg des heiligen Romischen riches ertemarschalk und
den erwirdigen in gote vater und herren h(er)n Johansen Erzebischof zu prage des babstlichen stules legaten daz sie als gezeuge der obgeschriben lehenschaft
und sachen ire ingesigele an disen brief zu dem unsern hangen wellen Und wir obgenanten Wenczlaw hertzog zu sachsen und zu lunemburg des
heiligen Romischen riches Ertemarschalk Und Johans Erzebischof zu prage des babstlichen stules legat thun und bekennen vor allermencklichen
daz wir durch bete willen des vorgenanten graue Rudolffs von Hohemb(er)g unser ingesigele zu dem sinem als gezeuge an disen brief gehangen
habn der geben ist zu trinn an der elbe an sant Martins tag Nach cristus geburt druczehenhundert jare darnach in dem zway und
sibenczigosten jare