Ich Heinrich von Hartenstain, Anne mein eliche wirtin, und unse baide erben, ver
jehen offenlichen an disem briefe, und tun chunt allen den, die disen brief sehent, lesent
od(er) horent lesen, Daz ich des erben mannes chint h(er)n Heinriches des richofers, und
seiner elichen wirtin vrawen Dutilgen, und alle ir selben nachchomen, die mich von recht
eigenshaft an gehorten, und mein aigen wâren, von erst mit namen, Haiman ir baider sune,
Johans sein brud(er), friderich sein brud(er), Cunrat sein brud(er), ulrich sein brud(er), Dieterich sein
brud(er), elsbet, und offemie ir swestere, und Gerten ir mut(er), Mechtild von Anzendorf,
Johans, und Heinrich ir sune, d(er) genanten Mechtilde, chunegunt, Alhet, und elsbet, d(er) selben
Mechtilde tocht(er)e, und Reimar, d(er) selben Mechtilde brud(er), haben v(er)chauft uns(er)m h(er)r(e)n
h(er)r(e)n purgraven frid(er)ich von Nurenberch, und seinen erben fur aigen laute, und mit allem rehte,
als ich sie her bracht han, in eigenshaft, umme zwenzich phunt haller, d(er) ich gar gewert
bin und geczalt, Und han auch gelobt bei meinen trewn, und ainen ayt dar nach gesworn,
daz ich meinen h(er)r(e)n den vorgenanten purgraven sol weren d(er) vorgenanten laute, und ir nach
chomen als vor gescriben stat als landes reht ist, swa man von mir reht wil nemen, wolt
man von mir nicht rehtes nemen so sol mein h(er)r(e) d(er) purgraf, od(er) seine erben unrechtes sich
weren, Ez sol auch uns(er) h(er)r(e) d(er) purgraf od(er) seine erben uns gelaite geben zu tagen, als s(er)
es tu(o)n mag, mit gelaite, und sein gelaite gut, ob ez ze schulden chumt, Des sint gezeuge
h(er)r Heinrich von wendelbach, d(er) ritt(er), h(er)r Johans von Ilenberch, d(er) ritt(er), h(er)r fridrich
von Debuzingen d(er) ritt(er), h(er)r Lutz von wendelbach, und and(er) erber laute genuge
D(er) brief ist gegeben zu chadelspurch, do man zalt von cristes geburte drewzehen
hundert jar, und dar nach in dem funfuntzwenzigistem jare, an sente Mathies
abende des zwelfboten, v(er)sigelt mit meinem Infigele daz dran hanget zu stetichait dises chaufes.