Wir fridrich von gotis gnaden pfallenczgraue bei rein vnd Herczoge in Beyern Bekennen vnd tunkunt offenlich mit disem
briefe allen den die yn sehent odir horent lezen Wanne der Allirdurchluchtigste furste vnd herre her karl Romischer
keiser zu allen zeiten merer des Reichs vnd kunig zu Behem vnser lieber gnediger herre mit dem hochgeborn fursten
hern Otten Margrafen zu Brandenburg vnsim lieben vettern vnd ouch mit vns aller spenne cweivnge vnd misse
hel die cwisschen im an eynem teile vnd vns an dem andern geweszen sein gar vnd allersacht enrichtet vnd entschei
den ist Also das vnser herre der keiser demselben vnsim vettern etliche lande slozz vnd gute beide erblich vnd
in pfandis weiz vnd ouch egliche gelde vnd gulde geben vnd leueget hat doran im genvget vnd ouch vns so vil
geben vnd getan hat das vns wol genvget vnd im ouch fleizziclichen dankin So das vnser egenant vetter dessel
ben vnsers herren des keisers kinden der Marke zu Brandenburg mit alln iren herschefften vnd zugehorungen ab
getreten hat vnd die an sie erblich vnd eweclich vorzichet Als das alles in briefen die sie beiderseit eynandir dor
vbir geben habn volkomplich begriffen ist vnd wann in der hochgeborn furste vnd herre her Stephan Herczog in
Beyern vnser lieber vatir her Stephan vnd her hans vnser brudir vnd wir etwas ansprache vnd zuuorsichte
zu der Marke gehabt han von huldung vnd briefe wegen die vns irer geuten lwn der Marke vnder swen vnd swor
den sein Dorumb mit wolbedachtem mute mit gutem rate willen vnd wizzen der egenant vnsirs vatir vnd
brudir so vorzeihen wir vns fur dieselbn vnsir vatir vnd vnsir brudir vnd vnser aller erben aller ansprach
vnd zuuorsicht die wir alle odir vnser dheiner an der egenanten Marke zu Brandenburg odir zu dheinen iren
landen luten rechten vnd zugehorung gehabt hetten odir noch in kunftigen zeiten in dheinen weiz ymmer ge
wunnen mochten vnd globen in guten truwen an alles geuerde vnd argelist vnd bei dem eyde den wir dorubn
zu den heiligen leiplichen gesworn haben das wir alle noch vnser aller erben noch derselben Marke odir dheinen
iren stukken vnd zugehorungn allichis odir be teylen nymmer in dheinen zeiten gestellen noch gesrechen sullen mit
keinen anspruchen Geistlichs odir weltlichs gerichtes odir sust mit dheinen wegen odir wyse die yemant erden
ken mochte heymlich odir offenlich an alles geuerde vnd ouch alle die briefe die wir von vnsim vettern Herczog Otten
den lantsluten odir steten der Marke zu Brandenburg vbir dhein huldung eyde odir glubde gehabt haben odir noch
hetten das wir die alle vnd ir yeglichs zusamt vnuorcogentlich vnsim herren dem keiser vnd seinen kinden widergebn
vnd antwurten sulln an alles geuerde Were abir das dheyner sulcher briefe der leicht von vorgezzenheit odir sust in
dheinen weiz vorhalden waz hernach zu licht queme ir wer eyner odir mer sullen tod sein vnd kein krafft noch
macht habn vnd ouch den egenant vnsirs herren des keisers kinden vnd iren erben an der gewere vnd geruclich
besiczunge der egen Marke zu Brandenburg vnd aller irer zugehorungn keinen schaden bringen Ouch globen wir
bei vnsin truwen vnd eyden als vorgeschriben stet das wir schaffen vnd bestelln sulln vnd wollen das die egenant
vnser vatir vnd vnsir brudir dieselbn vorgeschriben vorgeyunge vnd glubde mvntlichen tun sullen glicherweiz als
wir sie getan haben vnd ouch sulche briefe vnder iren Inziglen geben von worte zu worte als diser gegenwertig
brief lautet an alles geuerde Mit vrkund ditz briefs vorsigelt mit vnsim anhangenden Inzigle Geben zu furstenwalt
an sand Agapiti tag noch Cristi geburde Dreuczenhundirt Iar dornach in dem dreyundsibenczigistem Iare