Wir der Burgmeyster Ammame die Gesworen vnd die Burger gemeinlich der Stat zu Ratenowe fur vns alle
vnse erben vnd nachkomen Burgere zu Ratenowe ewiclichen bekennen offenlich mit diesem briue Wann
die hochgebornen fursten vnd herren her otte pfalzgraue bey Reyn herzog in peyern zu den zeiten vnser herre
vnd marggraff zu Brandenburg vnd her fridrich herzog in peyern fur sich her Stephan den eltern her Stephan
vnd her Johansen vnd ire erbin herzogen in peyern vns allirhuldunge eide vnd gelobde die wir in getan haben ledig
vnd loz gesagt vnd genzlichin gelossen haben vnd vns an den durchluchtigsten fursten vnd herren hern Wenczlaw
kunig zu Behem marggrafen zu Brandenburg vnd herzogen in Slesien vnsern libn gnedigen herren an seine
bruder vnd ir allir erbin vnd ab sie nicht weren an den hochgebornen fursten hern Johansen marggrauen zu
merhern vnd seine erben als an marggrauen zu Brandenburg erblichen lediclichin vnd ewiclichin gewiset
haben dorumb wir mit wolbedachtem volkomenem vnd gemeinem rate der selbin vnser Stat zu Ratenowe dem
selbin vnsern herren dem kunigin seinen brudern vnd iren erbin als marggrauen zu Brandenburg vnd ab sie
nicht weren dem egenant hern Johansen marggrauen zu merhern seinen erbin vnd irer allir nachkomen
als marggrauen zu Brandenburg gehuldet gelobet vnd gesworen haben fur vns vnd vnser allir erben
vnd nachkomen Burgere deselbst zu Ratenowe vnd sweren ouch in guten truwen one allis geuerde mit
krafft diz briues als vnsern rechten erblichen ordenlichen vnd naturlichen herren marggrauen zu Brandenb(urg)
vnd gelobn fur vns alle vnse erbin vnd nachkomen als vorgeschribn stehet den selbem vnsern herren dem
kunigin seinen brudern vnd irer allir erbin vnd ab sie nicht weren dem egenant vnsern herren dem marggraff
zu merhern vnd seinen erbin als marggrauen zu Brandenburg getrewe gewere gehorsam vnd vndertan
zu sein iren frumen zu werben iren schaden zuwenden vnd allis das gen in zutun das rechte erbliche Burger
vnd lewte gen iren rechten erblichen ordenlichin vnd naturlichen herren marggrauen zu Brandenburg durch recht
vnd gewonheit pflichtig sein zutun Mit urkund diz briues besigelt mit der egenant vnser Stat Jngsigel der
gebn ist zu Ratenowe nach crists geburte dreyzehenhundirt Jar vnd dornach in dem dreyvndsibenczigisten Jare
an sant Egidien tag