Wir die Burgmeister Ratmanne die Gesworn und die Burger gemeinlichen der Stat zu Tangermunde fur
uns alle unse Erben und Nachkomen Burger zu Tangermunde ewiclichen bekennen offenlich mit diessem
brieve wann die hochgeboren fursten und herren er Otte pfaltzgrave bey Reyn herzog in peyern zu den zeiten
unser herre und Markgrave zu Brandemburg und er Fridrich herzog in peyern fur sich ein Stephan den Eltern
ein Stephan und ein Johannsen und ir Erben herzogen in peyern uns allir huldunge eyde und gelobde die wir
in getan haben ledig und los gesagt und genzlichen gelassen haben und uns an den durchluchtigen fursten
und herren ein Wenczlan kunige zu Beheim Markgraven zu Brandemburg und herzogen in Slezien unsen lieben
gnedigen herren an seine Bruder und ir allir Erben und ab sie nicht weren an den hochgeboren fursten ein
Johannsen Markgraven zu Merhern und seine Erben als an Markgraven zu Brandemburg ewiclichen ledi=
clichen sond ewiclichen geweisst haben darumb so haben wir mit wolbedachtem volkomenem und gemei=
nem Rate derselben unser Stat zu Tangermunde demselben unsem herren dem kunige seinen Brudern und
iren Erben als Markgraven zu Brandemburg und ab sie nicht weren dem egenanten Johannsen Markgra=
ven zu Merhern seinen Erben und ir allir Nachkomen als Markgraven zu Brandemburg huld gelobt
und gesworen fur uns alle unser Erben und Nachkomen Burgere in derselben Stat zu Tangermunde
und sweren auch in guten trewen on allis geverde mit krafft dis brieves als unsen rechten erblichen or=
denlichen und naturlichen herren Markgraven zu Brandemburg und geloben fur uns alle unse Erben
und Nachkomen als vorgeschriben stehet demselben unsem herren dem kunige seinen Brudern und ir allir
Erben und ab sie nicht weren dem egenanten unsem herren dem Markgraven von Merhern und seinen Erben
als Markgraven zu Brandemburg getrewe gewer gehorsam und undertanik zu sein iren frumen zu werbin
iren schaden zu wenden und allis das gen in zutun das rechte erbliche Burgere und lewte iren rechten
erblichen ordenlichen und naturlichen herren Markgraven zu Brandemburg durch recht und gewonheit
pflichtig sein zu tunde Mit urkunt dis brieves versigelt mit unser egenanten Stat Ingesigel der gebin ist
zu Tangermunde Nach Cristes geburte dreizehenhundert Jar dor nach in dem dreyundsibenzigsten Jare
an unser frawen abend als sie geboren wart