Wir die Ratlute vnd Burger gemeinlich der Stat zu Kunigsperg Bekennen fur vns alle vnser erben vnd nachkomen Burger zu Kunigsperg vnd fur die selben Stat ewi
clich Vnd tun kunt offenlich mit disem briue allen den die yn sehent oder horent lesen Wann wir Vormals gesworen vnd eidiclich gehuldit haben vnsers liben gnedigen herren
keiser karls sonen kunig Wenczlaw von Beheim vnd seinen Brudern vnd ir aller erben vnd erbes erben als markgrauen zu Brandemburg vnsern rechten erbherren Vnd
ob die alle nicht weren markgrauen Johansen von Merhern des egenanten vnsers herren des keisers Bruder seinen erben vnd erbes erben als daz in andern briuen die wir
yn daruber gegeben haben volkomenlicher ist begriffen Vnd wann ouch nu der egenant vnser herre der keiser sunderlichen betrachtit hat wie er die marken zu Brandemb(urg)
mit iren landen Steten vnd lewten die Vormals langezeit mit manigvaldigem kriege kordalet vnd beschediget ist in ewigen frid vnd schirm seczen muge Vnd vns
zu sunderlichen gnaden gegunst hat vnd gan daz wir vnd die egenant mark zu Brandemburg von dem kunigriche vnd lande zu Beheim der markgraffschaffte zu lusicz
den herzogtumen zu Bressla zu der Swidnicz vnd zum Jawr die zu dem kunigriche vnd der kronen zu Beheim gehoren Vnd dasselb kunigrich hinwider von vns vnd der
marken ewigen stete hilfe vnd rat haben mugen Vnd ouch daz wir vnd die marke zu Brandemburg vns zu demselben kunigriche vnd lande zu Beheim in ewige ey
nunge fassen vnd fride seczen mugen Dauon zu eren vnd dinst dem heiligen Romischen Reiche durch ewigen frid besserunge vnd nuczes willen vnser vnd der marken
zu Brandemburg die wir in disen sachen kentlich erkant haben vnd erkennen So haben wir mit wolbedachtem mute gutem vorrat vnd von rechten wissen fur vns vnser
erben vnd nachkomen ewiclich vnd die egenant stat zu kunigsperg mit willen vnd volbort des egenanten vnsers herren des keisers als eines obristen lehnherren der egenanten
marken zu Brandemburg dem vorgenanten vnserm herren kunig Wenczlaw allen seinen Brudern vnd ir aller erben erbes erben vnd nachkomen die im sein vnd hernach
geboren werden kunige zu Beheim Vnd ob die nicht weren dem egenanten markgrafen Johansen von Merhern allen seinen erben vnd erbes erben als markgrauen zu Brand(em)
burg vnsern rechten erbherren gelobt vnd gesworen geloben vnd sweren in guten trewen on alles geuerde daz wir ewiclich bei dem kunigreich vnd lande zu Beheim bleiben
wollen vnd sullen Vnd wir sullen vnd wollen vns dauon nymmer scheiden oder scheiden lassen durch dheinerlei sachen oder sachen willen in dheinerweis Vnd were es
sache daz vnsers herren kunig Wenczlaws zu Beheim Bruder erben oder Vettern oder derselben erben vnd nachkomen die im sein oder in kunftigen zeiten werden vns(er)
herren markgrauen zu Brandemburg ir weren einer oder mere vns von dem kunigreich vnd lande zu Beheim dem kunige vnd andern seinen Brudern Vettern erben vnd
erbes erben die in zeiten vnser herren markgrauen zu Brandemburg sein vnd werden scheiden wolten Oder ob sie die marken zu Brandemburg zu mal oder ir ein
teil von dem lande der marken vorgeben verkouffen verseczen verwechseln oder empfremden wolten So sullen wir obgenant Ratlute Burger vnd Stat dem oder den
selben nichtes pflichtig oder verbunden sein von huldung wegen noch sust in dheinerweis Vnd den oder die fur vnser herren nicht haben alle die weil daz sie
von sulchen sachen nicht lassen Sunder vns halden an den kunige von Beheim vnd ander seine Bruder Vettern erben erbes erben vnd nachkomen die denne
vnser herren markgrauen zu Brandemburg sein oder sein werden Vnd die sulche vorgenant scheidunge vorgebunge verkouffunge verwechselunge verseczunge
oder empfremdunge nicht teten Wer ouch sache daz die obgenanten vnser herren kunig Wenczlaw von Beheim seine Bruder vnd ir erben erbes erben vnd nachkome(n)
kunige zu Beheim vnd markgrauen zu Brandemburg der obgenant markgraff Johans von Merhern seine erben vnd erbes erben alle abesturben des got fur sei
So haben wir obgenanten Ratlute vnd Burger zu kunigsperg fur vns vnser erben vnd nachkomen Burger zu kunigsperg vnd fur die selben stat ewiclich
gelobt vnd gesworen geloben vnd sweren von rechten wissen mit krafft dicz briues in guten trewen on alles geuerde einem iglichen kunige zu Beheim der
denne in zeiten wirdet vnd ist daz wir den vnd mit ym seine erben vnd nachkomen ewiclich vnd nymand anders vor markgrauen zu Brandemburg vnser rechte(n)
naturliche erbherren haben vnd halden sullen vnd wollen Vnd vns von ym dem kunigriche zu Beheim seinen egenanten furstentumen herschefften vnd landen
die darzu gehoren nicht scheiden noch scheiden lassen sullen noch wellen in dheinerweis on alles geuerde Wenne es ouch zu sulchen schulden kumpt So sullen
vns dieselben vnser Erbherren vnser recht briue vnd friheit bestetigen als ir vorfarn markgrauen zu Brandemburg getan haben Vnd des zu ewigem vr
kunde vnd ganczer sicherheite haben wir vnser egenanten stat Infigel an disen brieff lassen hengen Der geben ist zu kunigsperg Nach cristus geburte drewze
henhundert Jare darnach in dem vierundsibenczigstem Jare an dem heiligen Pfingest tage