Wyr Ratlewte vnd Burgere gemeinlichn der Stat zu Alten landsperg Bekennen fur vns alle vnser erbn vnd nachkomen Burgere zu Alten landsperg vnd fur dieselbe Stat ewiclichn vnd
tun kunt offenlich mit disem briue allen den die yn sehen oder horent lesn Wann wir furmals gesworen vnd erblich gehuldit habn vnsm liebn gnedigen hern keis(er) karls sunen kunig
Wenczlawey von Beheim vnd seinen brudern vnd ir aller erbn vnd erbes erbn als marggraffen zu Brandenburg vnsm rechten erbhern vnd ab die alle nicht weren marggraffen Johansen
von Merhern des egenan(ten) vns(er)s hern des keis(er)s bruder seinen erbn vnd erbes erbn als das in andern vnsern briuen die wir yn daruber gebn habn vollenkomenlicher ist Begriffen Vnd
wann auch nu der egenant vnser her der keiser sunderlichen betrachten hat wie er die marken zu Brandenburg mit weylandn steten sind luten die furmals lange zeit mit manig
faldigem kriege vorterbet vnd beschediget ist in ewigen fride vnd selickeit seczen muge Vnd vns zu sunderlichn gnaden gegunnet hat vnd gan das wir vnd die egenant marke
zu Brandenburg von dem kunigreiche vnd lande zu Beheim der marggraueschafft zu lusicz den Herczogtum(en) zu Breslaw zu der Swidnicz vnd zu dem Jawer die zu dem kunig
reiche vnd der kronen zu Beheim gehoren Vnd dasselbe kunigreiche hinwidir von vns vnd der marken ewigen schucz hilfe vnd rat habn mugen Vnd auch das wir vnd
die Marke zu Brandenburg vns zu demselbn kunigreiche vnd lande zu Beheim in ewige eynunge saczen vnd friden seczen mugen dauon zu eren vnd dienste dem heiligen ro
mischen Reiche durch ewigen friden besserunge vnd nuczes willn vnser vnd der marken zu Brandenburg die wir an disen sachen kentlich erkant habn vnd eygentlichen erken
nen So habn wir mit wolbedachtem mute gutem vorrate vnd von vnsern rechten wissn fur vns vnsere erbn vnd nachkomen ewiclichn Vnd die egenant Stat Alten
landsperg mit willn vnd volbord des egenant vns(er)s h(er)rn des keis(er)s als eynes obristen lehenherren der obgenant marken zu Brandenburg dem vorgenant vns(er)m herren
kunig Wenczlaw alln seinen brudern vnd ir aller erbn erbes erbn vnd nachkomen die nu sein vnd hirnach geboren werden kunige zu Beheim Vnd ab die alle nicht weren
dem obgenant marggraffen Johansen von Merhern alln seinen erbn vnd erbes erbn als marggraffen zu Brandenburg vns(er)n rechten erbhern gelobt vnd gesworen gelobn
vnd sweren in guten trewn an alles geuerde das wir ewiclichen bey dem kunigreiche vnd lande zu Beheim bleibn welln vnd sulln Vnd wir sulln vnd welln vns dauon
nymmer scheiden abscheyden lassn durch dheinerley sachen oder sachen willn in dheineweis Vnd weres sache das vns(er) h(er)re kunig Wenczlaw zu Beheim bruder vetern
oder vettern oder derselbn erbn vnd nachkomen die nu sein oder in kunfftigem zeiten werdn vns(er) herren marggraffen zu Brandenburg ir lewen eyner oder mer
vns von dem kunigreiche vnd lande zu Beheim dem kunige vnd and(er)n seinen brudern vettern erbn vnd erbes erbn die in zeiten vns(er) h(er)ren marggraffen zu Brandenb(ur)g
sein vnd werdn scheiden wolten oder ab sie die marke zu Brandenburg zumale oder ir eyn teil von dem lande der marken vorgebn vorkauffen vorseczen vorwechseln
oder entfremden wolten So sulln wir obgenant Ratlute burgere vnd Stat dem oder denselbn nichtes pflichtig oder vorbundn sein von huldungen wegen noch sust
in dheineweis Vnd den oder die fur vnsere herren nicht habn alle die wile das sie nicht von sulchen sachen lassn Sunder vns halden an den kunig von Beheim
vnd an ander seine bruder vettern erbn erbes erbn vnd nachkomen die danne vnsere h(er)ren marggraffen zu Brandenburg sein oder sein werdn Vnd die sulche vorge
scheidungen vorgebungen vorkauffungen vorseczungen vorwechselungen oder entfremdungen nicht teten Were auch sache das die obgenan(ten) vns(er) h(er)ren kunig Wenczlaw
von Beheim seine bruder vnd ir aller erbn erbes erbn vnd nachkomen kunige zu Beheim vnd marggraffen zu Brandenburg der obgenan(te) marggraffe Johans von Mer
hern seine erbn vnd erbes erbn alle abesturben do got fur sy So habn wir obgenant Ratlute vnd Burgere zu Alten landsperg fur vns vnsere erbn vnd nachkomen
burgere zu Alten landsperg vnd fur dieselbn Stat ewiclichn globt vnd gesworen globn vnd sweren von recht(er) wissen mit auffs die briues in guten trewn an alles geuerde
eynem iglichn kunige zu Beheim der danne in zeiten wirdet vnd ist das wir den vnd mit ym seine erbn vnd nachkomen ewiclichn vnd nymands anders vor marggraffen
zu Brandenburg vnsere rechte naturlichen erbherren habn vnd halden sulln vnd welln Vnd vns von ym dem kunigreiche zu Beheim seinen egenant furstentumen
herschefften vnd landen die darzu gehoren nicht scheiden noch scheiden lassen sulln noch welln in dheineweis an alles geuerde Wenne es auch zu sulchen schulden kumet
So sulln vns dieselbn vnse erbherren vns(er)e rechte briue vnd friheit bestetigen als ir vorfarn marggraffen zu Brandenburg getan habn Vnd des zu ewigem vrkunde
vnd ganczer sicherheit habn wir vnser egenan(ten) Stat Jngesigel an dysen brieff lassn hangen der gebn ist zu Alten landsperg nach cristi geburte dreyczenhundert Jare
darnach in dem vierundsibenczigistem Jare an dem heiligen pfingst tage