Wir Rathute vnd Burger gemeinlich der Stat zu Muncheberg Bekennen fur vns alle vnser erben vnd nachkomen Burger zu Muncheberg vnd fur dieselben Stat ewiclichen Vnd tun kunt offenlich mit disem
briue allen den die yn sehent oder horent lesen Wann wir vormals gesworen vnd erblichen gehuldet haben vnsers liben gnedigen herren keiser karls Sonen kunig Wenczlawen von Beheim vnd seinen Brudern
vnd ir aller erben vnd erbes erben als Markgrauen zu Brandemburg vnsern rechten erbherren Vnd ob die alle nicht weren Markgrauen Johansen von Merhern des egenanten vnsers Herren des keisers Brud(er)
seinen erben vnd erbes erben als das in andern vnsern briuen die wir yn daruber gegeben haben volkomenlicher ist begriffen Vnd wann ouch nu der egenant vnser herre der keiser sunderlich betrachte(t)
hat wie er die Marken zu Brandemburg mit iren landen Steten vnd leuten die vormals langezeit mit manigueldigem kriege vorterbet vnd beschedigt ist in ewigen fride vnd selikeit seczen muge Vnd
vns zu sunderlichen gnaden gegunst hat vnd gan daz wir vnd die egenant Marke zu Brandemburg von dem kunigriche vnd lande zu Beheim der Markgraffschaft zu Lusicz den Herczogtumen zu
Bressla zu der Swidnicz vnd zu dem Jawor die zu dem kunigriche vnd der Cronen zu Beheim gehoren Vnd dasselb kunigriche hinwider von vns vnd der Marken ewigen schucz hilfe vnd rate haben
muzen Vnd ouch daz wir vnd die Marken zu Brandemburg vns zu demselben kunigriche vnd lande zu Beheim in ewige eynunge fassen vnd fride seczen mugen dauon zu eren vnd nucze dem hei
ligen Romischem Rache durch ewigen fride besserunge vnd nuczes willen vnser vnd der Marken zu Brandemburg die wir in disen sachen kintlich erkant haben vnd eugentlich erkennen So haben wir
mit wolbedachtem mute gutem vorrate Vnd von vnsern rechten wissen fur vns vnser erben vnd nachkomen ewiclichen vnd die egenanten stat zu Muncheberg mit willen vnd volbort des egenanten vns(er)s
Herren des keisers als eines obristen lehenherren der egenanten Marken zu Brandemburg dem vorgenanten vnserm herren kunige Wenczlaw allen seinen Brudern vnd ir aller erben erbes erben vnd
nachkomen die nu sein vnd hernach geborn werden kunige zu Beheim Vnd ob die nicht weren dem obgenanten Markgrauen Johansen von Merhern allen seinen erben vnd erbes erben als Markgrauen
zu Brandemburg vnsern rechten Erbherren gelobt vnd gesworen geloben vnd sweren in guten trewen an alles geuerde Daz wir ewiclich bei dem kunigriche vnd lande zu Beheim bleiben wollen vnd sullen
Vnd wir swellen vnd sullen vns dauon nymmer scheiden oder scheiden lassen durch dheinerlei sache oder sachen willen in dheinerweis Vnd were es sache daz vnsers herren kunig Wenczlawes Bruder
erben oder Vettern oder derselben erben vnd nachkomen die nu sein oder in kunftigen czeiten werden vnser herren Markgrauen zu Brandemburg Ir iener einer oder mere vns von dem kunigriche
vnd lande zu Beheim dem kunige vnd and(er)n seinen Brudern Vettern erben vnd erbes erben die in czeiten vnser Herren Markgrauen zu Brandemburg sein vnd werden scheiden wolten Oder ob sie die Marken
zu Brandemburg zumale oder ir ein teile von dem lande der Marken vorgeben vorkouffen vorseczen vorwecheln oder empfremden wolten So sullen wir obgenante Rathute Burger vnd Stat dem oder den
selben nichtes pflichtig sein an huldungen wegen noch sust in dheinerweis Vnd den oder die fur vnser herren nicht haben alle die weile daz sie nicht lon sulchen sachen lassen Sunder vns halden an d(en)
kunig von Beheim vnd ander seine Bruder Vettern erben erbes erben vnd nachkomen die denne vnser Herren Markgrauen zu Brandemburg sein oder sein werden Vnd die sulche vorgenant scheidunge vorge
bunge vorkouffunge vorseczunge vorwechelnunge oder empfremdunge nicht teten Were ouch sache daz die obgenanten vnser Herren kunig Wenczlaw von Beheim seine Bruder vnd ir aller erben erbes
erben vnd nachkomen kunige zu Beheim vnd Markgrauen zu Brandemburg der obgenant Markgraff Johans von Merhern seine erben vnd erbes erben alle abesturben do got fur sei So haben wir obgen(anten)
Rathute vnd Burger zu Muncheberg fur vns vnser erben vnd nachkomen Burger zu Muncheberg vnd fur dieselben Stat ewiclichen gelobt vnd gesworen geloben vnd sweren von rechter wissen mit kraft dicz
briues in guten trewen an alles geuerde Eynem iglichen kunige zu Beheim der denne in czeiten wirdet vnd ist daz wir den vnd mit ym seine erben vnd nachkomen ewiclich vnd nymand anders fur
Markgrauen von Brandemburg vnser rechte naturlichen Erbherren haben vnd halden sullen vnd wollen Vnd vns von ym dem kunigriche zu Beheim seinen egenanten furstentumen herschefften vnd
landen die darzu gehoren nicht scheiden noch scheiden lassen sullen noch wellen in dheinerweis an alles geuerde Wenne es ouch zu sulchen schulden kumpt So sullen vns die selben vnser Erbherren
vnsere Rechte Briue vnd freiheit bestetigen als ir vorfarn Markgrauen zu Brandemburg getan haben Vnd des zu ewigem vrkunde vnd ganczer sicherheit haben wir vnser egenant Stat Ingesigel
an disen brieff lassen hengen Der geben ist zu Muncheberg Nach Cristus geburte Dreiczehenhundert Jare darnach in dem vierundsibenczigstem Jare In dem heiligen pfingest tage