Wir Ratlute vnd Burger gemenlichen der stat zu Sehusen Bekennen fur vns alle vnser Erben vnd nachkomen Burger zu Sehusen vnd fur dieselben stat ewiclichen vnd tun kunt offenlich mit disem briue allen
den die yn sehen oder horen lesen Wanne wir vormals gesworen vnd erblichen gehuldet haben vns(er)s lieben gnedigen Herren keiser karls Sone(n) kunig Wenczlaw von Behem vnd seinen Brudern vnd yr aller Erben
vnd erbes erben als marggrauen zu Brandemburg vns(er)n rechten Erbherren vnd ab die alle nicht weren marggrauen Johansen von merhern des egen(anten) vns(er)s herren des keisers Bruder seinen Erben vnd Erbes erben
als das in andern vns(er)n briefen die wir yn doruber geben haben vollenkomenlicher ist begriffen Vnd nu(m)me auch nu der egen(ante) vnser herre der keiser sunderlichen betracht hat wie er die marken zu Brandemb(ur)g
mit yren landen Steten vnd leuten die vormals lange zeit mit manigualdigem kriege vordarbet vnd beschediget ist in ewigen fride vnd selikeit seczen muge vnd vns zu sunderlichen gnaden gegunst hat vnd
gan das wir vnd die egen(ante) marke zu Brandemburg von dem kunigreiche vnd lande zu Behem der marggraffschafft zu lusicz den herczotumen zu Bresslaw zu der Swidnicz vnd zu dem Jawer die zu dem kunigrei
che vnd der Croney zu Behem gehoren vnd dasselbe kunigreich hinwider von vns vnd der marken ewigen schucz hulffe vnd rate haben mugen vnd auch das wir vnd die marken zu Brandemburg vns zu demselben
kunigreiche vnd lande zu Behem in ewige eynunge saczen vnd slissen seczen mugen douon zu eren vnd dinste dem heiligen Romischen Reiche durch ewigen friden besserungen vnd nuczes willen vnser vnd der marken
zu Brandemburg die wir in disen sachen kintlichen erkant haben vnd eygentlichen erkennen So haben wir mit wolbedachtem mute gutem vorrate vnd von vns(er) rechter wissen fur vns vnse erben vnd nachkomen
ewiclichen vnd die egen(ante) stat Sehusen mit willen vnd volbort des egen(anten) vnsers Herren des keisers als eynes obristen lehenherren der egenan(ten) marken zu Brandemburg dem vorgenan(ten) vns(er)m herren kunige Wenczlawen
allen seinen Brudern vnd yr aller erben Erbes erben vnd nachkomen die nu seyn vnd hernach geborn wrden kunige zu Behem vnd ab die nicht weren dem obgenant(en) marggrafen Johansen von merhern allen seinen
erben vnd Erbes Erben als marggrauen zu Brandemburg vns(er)n rechten Erbherren gelobt vnd gesworen geloben vnd sweren in guten truwen ane alles geuerde das wir ewiclichen bei dem kunigreiche vnd land zu Behem
beleiben wollen vnd sullen vnd wir sullen vnd wollen vns douon nymmer scheiden oder scheiden lassen durch dheinerley stucken oder sachen willen in dheinerweis Vnd her es sache das vns(er) herren kunig Wenczlaw
zu Behem Bruder erben oder vettern oder derselben erben vnd nachkomen die nu seyn oder in kunfftigen zeiten werden vnser herren marggrauen zu Brandemburg yr sweren eyner oder mer vns von dem kunigreiche vnd
lande zu Behem dem kunige vnd andern seinen Brudern vettern Erben vnd Erbes Erben die in zeiten vnser herren marggrauen zu Brandemburg seyn vnd werden scheiden wolten oder ab sie die marke zu Brandemburg
zumale oder yr eyn teile von dem lande der marken vorgeben vorkauffen vorseczen vorwechseln oder empfremden wolten So sullen wir obgen(anten) Ratlute Burger vnd Stat dem ob denselben nichtes pflichtig oder vorbunden seyn
von huldungen wegen noch sust in dheinerweis vnd den oder die vor vnsere herren nicht haben alle die weile das sie nicht von sulichen sachen lassen Sunder vns halden an den kunig von Behem vnd an andere seyne
Bruder Vettern erben erbes erben vnd nachkomen die denne vnse h(er)ren marggrauen zu Brandemburg seyn oder seyn werden vnd die sulbe vorgenan(te) scheidungen vorgebungen vorkauffungen vorseczungen vorwechse
lungen oder empfremdungen nicht teten Wer auch sache das die obgenan(ten) vnser herren kunig Wenczlaw von Behem seine Bruder vnd yr aller Erben erbes erben vnd nachkomen kunige zu Behem vnd marggraf
zu Brandemburg der obgenan(te) marggraff Johans von merhern seine Erben vnd erbes erben alle abesturben d(as) got fur sey So haben wir obgenant(e) Ratlute vnd Burger zu Sehusen fur vns vnser erben vnd nachkomen
Burger zu Sehusen vnd fur dieselben stat ewiclichen gelobt vnd gesworen geloben vnd sweren von rechter wissen mit craffte dicz brieffs in guten truwen ane alles geuerde eynem iczlichen kunige zu Behem der denne
in zeiten wirdet vnd ist das wir den vnd mit ym seine Erben vnd nachkomen ewiclichen vnd nymands anders vor marggrauen zu Brandemburg vns(er)n rechten naturliche(n) Erbherren haben vnd halden sullen vnd wol
len vnd vns von ym dem kunigreiche zu Behem seinen egen(anten) furstentumen herschefften vnd landen die dorzu gehoren nicht scheiden noch scheiden lassen sullen noch wollen in dheinerweis ane alles geuerde Wenne es
auch zu sulhen schulden kumpt So sullen vns dieselben vns(er) Erbherren vns(er) rechte briefe vnd freiheit bestetigen als yr vornarn marggrauen zu Brandemburg getan haben Vnd des zu ewigem vrkunde vnd
ganczer sicherheit haben wir vnser egenan(ten) stat Insigel an disen brieff lassen hengen der geben ist zu Sehusen Nach Crists gepurt dreiczenhundert Jare dornach in dem vier vnd sibenczigisten Jare an dem heiligen