Wir Ratleute und burgere gemenlichen der Newen Stat zu Soltwedel Bekennen fur uns alle unse erbn und nachkomen Burgere der erewen Stat zu Soltwedel und vor dieselbe Stat ewiclich(en)
und tun kund offenlich mit disem briue allen den die yn sehen oder horent lesen Wann wir furmals gesworen und erblichen gehuldet habn uns(er)m liben gnedigen Herren Keis(er) Karls Sonen kunige
Wenczslawen von Behem und seinen brudern und ir aller erbn und erbes erbn als marggrauen zu Brandenburg unsern rechten erbherren und ab die alle nicht weren marggrauen Johansen
von Merhern des egenan(ten) uns(er)s Herren des keis(er)s bruder seinen erbn und erbes erbn als das an andern unsern briuen die wir yn druber gebn habn vollenkome(n)licher ist begriffen Und wenn
auch nu der egenante unse Herre der keis(er) sunderlichen betracht(et) hat wie er die marke zu Brandenburg mit iren landen Steten und lewten die furmals lange zeit mit manchfaldigen
kriege vorterbet und beschediget ist in ewigen friden und selickeit seczen moge Und uns zu sunderlichen gnaden gegunst hat und gan das wir und die egenan(te) Marke zu Brandenburg von dem
kungreiche und dem lande zu Behem der marggraueschaft zu lusing den Herczogtumen zu Bresslaw zu der Swidnitz und zu dem Jawer die zu deme kungreiche und der cronen zu Behem gehoren
und dasselbe kungreiche hinwinder von uns und der marken ewigen schutz hilfe und rat habn mogen Und auch das wir und die marke zu Brandenburg uns zu demselben kungreiche und lande
zu Behem in ewige eynige saczt und fride seczen mogen devon zu eren und dienste dem heilgen Romischen Reiche durch ewigen fride besserunge und nuczes willen uns und der marken zu Brandenburg
die wir in disen sachen kintlich erkant haben und eygentlichen erkennen So habn wir mit wolbedachtem mute gutem vorrate und von rechten wissen fur uns unse erbn und nachkomen ewe=
lichen und die egenan(te) newe Stat zu Soltwedel mit willen und volbord des egenan(ten) uns(er)s Herren des keis(er)s als eynes obristen lehenherren der egenanten marken zu Brandenburg dem vor=
genan(ten) unserm Herren kunige Wenczlawen allen seinen brudern und ir aller erbn erbes erbn und nachkomen die nu sein und hirnach geboren werden kunige zu Behem und ab die nicht
weren dem obgenanten Johansen marggrauen von Merhern allen seinen erben und erbes erben als marggrauen zu Brandenburg unsern rechten erbherren gelobt und gesworen globen und sweren
in guten trewn on alles geuerde das wir ewiclichen bey deme kungreiche und lande zu Behem bleiben wollen und sullen Und wir sullen und welln uns devon nymer scheiden oder scheiden
lassen durch dheinerlei sachen oder sachen willen in dheinenweis Und weres sache das uns(er) Herren kunig Wenczlawes zu Behem bruder erbn oder vettern oder derselben erbn und nachkomen
die nu sein oder in kunftigen zeiten werden uns(er) Herren marggrauen zu Brandenburg er weren eyner oder mer Und von dem kungreiche und lande zu Behem dem kunige und andern
seinen brudern vettern erbn und erbes erbn die in zeiten uns(er) Herren marggrauen zu Brandenburg sein und werden scheiden wolten oder ab sie die marke zu Brandenburg zu male
oder wer eynteil von dem lande der marken vorgebn vorkauffen vorseczen vorwechseln oder entfremden wolten So sulln wir obgenan(te) Ratlute Burgere und Stat deme oder denselben
nichtes pflichtig oder vorbunden sein von huldungen wegen noch sust in dheinenweis und den oder die fur unse Herren nicht habn alle die weile das sie nicht von sulichen sachen lassen Sunder uns halten an
den kunig von Behem und an andere seine brudere vettern erbn und erbes erbn und nachkomen die denne unse Herren marggrauen zu Brandemb(ur)g sein oder sein werden und die sulche vorgenante
scheidungen vorgebungen vorkauffungen vorseczungen vorwechselungen oder entfremdungen nicht teten Wer auch sache das die obgenanten unse Herren kunig Wenczlaw von Behem seine bruder und
ir aller erbn erbes erbn und nachkomen kunige zu Behem und marggrauen zu Brandemb(ur)g der obgenan(te) marggraue Johans von Merhern seine erbn und erbes erbn alle abesturben so got nicht sey So
habn wir obgenan(te) Ratlute und Burgere der newen Stat zu Soltwedel fur uns unsere erbn und nachkomen Burgere der newen Stat zu Soltwedel und vor dieselbe Stat ewiclichen gelobt und ge
sworen globen und sweren von rechter wissen mit crafft ditz briues in guten trewen on alles geuerde eynem iglichen kunige zu Behem der denne in zeiten wirdet und ist das wir den und mit ym
seine erbn und nachkomen ewiclich(en) und nomands anders als marggrauen zu Brandemb(ur)g unser rechten naturlichen erbherren habn und halten sullen und wollen Und uns von ym dem kungreiche
zu Behem seinen egenan(ten) furstentumen herschefften und landen die dorzu gehoren nicht scheiden noch scheiden lassen sullen noch wollen in dheinenweis on alles geuerde Wenne es auch zu sulchen schul
den kumet So sulln uns dieselbn unse erbherren unsere rechte briue und friheit bestetigen als ire vorfarn marggrauen zu Brandenburg getan habn Und des zu ewigen urkund und ganczer
sicherkeit habn wir unse egenan(te) Stat Ingesigel an dissen brief lassen hangen Der Gebn ist in der Newen Stat zu Soltwedel nach Cristus geburte dreiczehnhundert Jare darnach in dem vierundsiben
czigsten Jare an dem halgen Pfingst tage