Wir Ratleute vnd Burgere gemenlichen der Stat zu Strausperg Bekennen fur vns alle vnser erben vnd nachkomen Burgere zu Strausperg vnd fur dieselben Stat ewiclichen vnd tun kunt offenlichen
mit disem briue allen den die yn sehent oder horent lesen Wann wir vormals gesworen vnd erblichen gehuldet haben vns(er)s herren gnedigen herren kaiser karls Sone kunige Wenczlaw(e)s von Be=
heim vnd sinen brudern vnd ir aller erben vnd erbis erben als Marggrauen zu Brandemburg vnsern rechten erbherren vnd ob die alle nicht weren Marggrauen Johansen von Merhern des
obgenan(ten) vnsers herren des kaisers Bruder sinen erben vnd erbis erben als das in andern vnsern briuen die wir yn druber geben haben vollenkomentlicher ist begriffen Vnd wanne auch nu der
obgenan(te) vnser herre der keiser sunderlichen betracht hat wie er die Marke zu Brandemburg mit iren landen Steten vnd lewten die vormals lange zeit mit manigvaldigem kriege vorterbit vnd
beschedigt ist in ewigen friden vnd selikeit seczen muge Vnd vns zu sunderlichen gnaden gegunst hat vnd gan(t) das wir vnd die egenan(te) Marke zu Brandemburg von dem kunigreiche vnd
land zu Beheim der Marggraueschafft zu Lusicz der herzogtummen zu Bresslaw zu der Swednicz vnd zu dem Jawer die zu dem kunigreiche vnd der Cronen zu Beheim gehoren vnd dasselbe
kunigreich hinwider von vns vnd der Marke ewigen schucz hilffe vnd rate haben mugen Vnd auch das wir vnd die Marke zu Brandemburg vns zudemselben kunigreiche vnd lande
zu Beheim in ewige eynunge sasse vnd fride seczen mugen dauon an ere vnd dienste dem heiligen romischen Richte durch ewigen fridu Besserungen vnd nuczes willen vnser vnd
der Marke zu Brandemburg die wir in disen sachen kintlichen erkant haben vnd eygentlich erkennen So haben wir mit wolbedachtem mute gutem vorrate vnd von vnser rechten
wissen fur vns vnser erben vnd nachkomen ewiclichen vnd die egen(ante) Stat zu Strausperg mit willen vnd volbort des egen(anten) vns(er)s herren des kaisers als eines oberisten lehenherren der
egenan(ten) Marken zu Brandemburg dem vorgenan(ten) vnsern herren kunige Wenczlaw allen sinen Brudern vnd ir allir erben erbis erben vnd nachkomen die nu sein vnd hernach geborn werden
kunige zu Beheim Vnd ob die nicht weren dem obgenan(ten) Marggrauen Johansen von Merhern allin sinen erben vnd erbis erben als Marggrauen zu Brandemburg vnsern rechten erbher=
ren gelobt vnd gesworen geloben vnd sweren in guten trewen on allis geuerde das wir ewiclichen bey dem kunigreiche vnd land zu Beheim bleiben wollen vnd sullen Vnd wir sul=
len vnd wollen vns dauon nymer scheiden oder scheiden lazen durch deheinerleye stucke oder sachen willen in deheinerweis Vnd were es sache das vnsers herren kunig Wenczlawes zu
Beheim Bruder erben oder Vettern oder derselben erben vnd nachkomen die in sein oder in kunftigen zeiten werden vnsern herren Marggrauen zu Brandemburg ir weren einer oder
mer vns von dem kunigreiche vnd land zu Beheim dem kunige vnd andern sinen Brudern Vettern erben vnd erbis erben die in geiten vnsere herren Marggrauen zu Brandemburg
sein vnd werden scheiden wolten Oder ob sie die Marke zu Brandemburg zumale oder ir ein teil von dem land der Marken vorgeben vorkauffen vorseczen vorwechseln oder empfrem=
den wolten So sullen wir obgenan(te) Ratleute Burger vnd Stat den oder denselben meiste pflichtig oder vorbunden sein von huldungen sweren noch sust in deheinerweis Vnd den oder
die fur vnsere herren nicht haben allis die weile das sie nicht von sulichen sachen lassen Sunder vns halden an den kunig von Beheim vnd an andern sine brudere Vettern erben erbis
erben vnd nachkomen die denne vnsere herren Marggrauen zu Brandemburg sein oder sein werden vnd die suliche vorgenan(te) scheidungen vorgebungen vorkauffungen vorseczun=
gen vorwechselungen oder empfremdungen nicht teten Wer auch sache das die obgenan(ten) vnsere herren kunig Wenczlaw von Beheim seine Bruder vnd ir allir erben erbis erben
vnd nachkomen kunige zu Beheim vnd Marggrauen zu Brandemburg der obgenan(te) Marggraue Johans von Merhern seine erben vnd erbis erben alle abesturben das got fur sey
So haben wir obgenan(te) Ratleute vnd Burger zu Strausperg fur vns vnsere erben vnd nachkomen Burgere zu Strausperg vnd fur dieselben Stat ewiclichen gelobt vnd gesworen ge=
loben vnd sweren von rechten wissen mit crafft dis briues in guten trewen on allis geuerde eynem yglichen kunige zu Beheim der denne in geiten wirdet vnd ist das wir den
vnd metym seine erben vnd nachkomen ewiclichen vnd nymand anders fur Marggrauen zu Brandemburg vnsern rechten naturlichen erbherren haben vnd halden sullen vnd
wollen vnd vns von ym dem kunigreiche zu Beheim sinen egenan(ten) furstentumen herrschafften vnd landen die doran gehoren nicht scheiden noch scheiden lassen sullen vnd wol=
len in deheinerweis on allis geuerde Wanne es auch an sulichen schulden kumpt So sullen vns dieselben vnsere erbherren vnsere rechte briue vnd freyheit bestetigen als ire
furfaren Marggrauen zu Brandemburg getan haben Vnd des zu ewigem vrkunde vnd ganczer sicherheit haben wir vnser egen(ante) Stat Jngesigel an disen brieff lassen hengen
Der geben ist zu Strausperg nach Cristes geburte dreyzehenhundert Jar darnach in dem vierundsibenczigisten Jare an dem heiligen pfingest tage