Wir Heinrich von gots gnaden furste von Anhalt vnd Graue zu Aschkanien bekennen fur vns vnse Erben vnd
Nachkomen fursten von Anhalt vnd Grauen zu Aschkanien vnd tun kunt offenlichen mit diesim briue allen den
die yn sehen oder horen lesen Daz wir dem Alludurchluchtigsten fursten vnd herren hern Karlen Romischem keise(r)
zu allen zeiten merer des Reiches vnd kunige zu Behem, Dem durchluchtigen Wenczlaw kunige zu Behem Mark=
grauen zu Brandemburg vnd hertzogen zu Slesien vnd allen andern vnse herren des keis(er)s sonen kunigen zu Be=
hem vnd Markgrauen zu Brandemburg mit wolbedachtem mute vnd rechter wissen gelobt haben vnd geloben fur
vns vnd vnse Erben mit kraffte ditz briues in guten truwen one alles geuerde Daz wir vnd vnse Erben mit vnsern
landen steten slossen vnd lewten den egenan(ten) vns(er)m herren dem keis(er) vnd seinen Erben kunigen zu Behem
vnd Markgrauen zu Brandemburg getrewlichen dienen Raten vnd helffen sullen vnd wollen gen Allumenglichen
zu irem rechten Wenne vnd wie dicke in des not geschiht on alles geuerde Auch sullen die egenan(ten) vnse herren
der keis(er) vnd seine Erben kunige zu Behem vnd Markgrauen zu Brandemburg vnse rechten allewege vnd gen
Allumenglichen gewaldig sein Mit vrkund ditz briues besigelt mit vns(er)m anhangenden Jngesigel der geben
ist zu Tangermund Nach Cristi geburte dreytzehenhund(er)t Jar dornach in dem vier vnd sibenczigsten Jare des
nehesten freytages vor sant Margrithen tage