Wir Ruprecht der elter von gotes gnaden pfaltzgraue bey Reine des heiligen Romischen Reichs Obirster Truchsesse vnd herzog in Beyern vnd wir Stephan der elter Otto des hey=
ligen Reichs Erczkamerer vnd korfurste sein bruder Stephan der Junge fridrich vnd Johans desselben herzog Stephans des eltern Sone von gotes gnaden alle pfaltzgra=
uen bey Reyne vnd herzogen in Beyern Bekennen vnd tun kunt offenlichen mit disem briue allen den die yn sehen oder horen lesen das wir mit wolbedachtem mute fvrme=
nen nutze durch vns vnd fromen vnser vnd vnser erben vnser furstentume vnd vnser lande vnd leute fur vns vnse erben vnd nachkomen die vnsere furstentume
herscheffte vnd erben besiczen vnd haben werden vnd fur herzog Ruprecht obgenanter fur vnsers bruders seligen etwenne herzogen Adolffs Son herzogen Ruprecht
den Jvngern vnd fur seinen Son herzogen Ruprecht den Jvngsten ob dieselben vnser furstentume herscheffte vnd erbe besiczen werden mit dem Allerdurchleuchtig=
sten Hochgebornen fursten vnd herren hern Karl Romischem keiser zu allen zeiten merer des Reichs vnd kunige zu beheim vnsern gnedigen herren vnd dem durch=
leuchtigen fursten vnd herren hern Wenczlawen kunige zu beheim seinem Sone dem hochgebornen fursten herren Johansen marggrauen zu merhern desselben vnsers
herren des keisers bruder vnd ir aller erben vnd nachkomen als ouch der durchleuchtige hochgeborne furste vnd herre her ludewig kunig zu vngern vnser lieber ohei=
me sich mit demselben vnsern herren dem keiser vnd seinem Sone vnd seinem bruder egenanten vnd iren erben voreinet hat vberkomen sein vnd vns voreinet haben al=
so das wir vnser erben vnd nachkomen ymmer ewiclichen nach iren kunigreiche zu beheim der marken zu brandemburg vnd zu merhern vnd iren furstentumen vnd
herschefften zu polan zu beyern vnd zu franken vnd ouch nach ir aller oder igliches herschefften landen pfantschefften Slossen Stetten saramnen leuten
vnd gutern vnd ouch nach andern iren landen leuten vnd gutern edeln vnd vnedeln wie die genant sint oder wo die gelegen sint die sie yczunt haben vnd nach gewinnen
mocht steen noch werben sullen noch die zu vns ziehen oder vns der vnderwinden in dheineweis ane alle argelist vnd geuerde vnd weres sache das yemant in kunftigen
zeiten nach iren kunigreiche furstentumen vnd herschefften landen pfantschefften leuten oder gutern die sie haben vnd gewinnen stunde wirbe oder sich der vnder=
wunde dem oder den sullen vnd wollen wir vnd vnsere erben vnd nachkomen die vnsere furstentume herscheffte vnd erbe besiczen werden darzu nicht beholffen sein
in dheineweis vnd ob sich dheine ire kunigreich furstentume herren oder herscheffte Stette Slosse lande pfantscheffte oder leute edel oder vnedel wie die genant
weren die sie haben vnd gewinnen mit guten willen an vns oder vnser erben vnd nachkomen als vorgeschriben steet ergeben oder halden wolten derselben kunigreiche
furstentume herren herscheffte Stette Slosse lande pfantscheffte vnd leute sullen wir vnser erben vnd nachkomen nicht ynneinen noch zu vns eziehen oder vns der
vnderwinden vngeuerden alle argelist vnd geuerde In dieser eynungen nemen wir doch aus das heilige Romische Reiche ane geuerde diese vorgeschribene stucke vnd
eynungen haben wir die obgenanten herzogen Ruprecht der elter Stephan der elter Otto Stephan der Junger fridrich vnd Johans fur vns vnd fur vnser aller erben vnd
nachkomen als vor geschriben steet in guten trewen gelobt stete vnd feste zuhalden vngeuerden alle argelist vnd geuerde des zu vrkunde vnd ewiger stetikeit hat vn=
ser iglicher sein Jngesigel fur sich vnd seine erben als vorgeschriben stet an diesen brief tun hengen Geben zu nuremberg nach crists geburt dreyzehnhundert Jar
darnach in dem vierundsibenczigsten Jare an der mitwochen nach sant michaels tage des erzengels