Wir Fridrich von gotes gnaden Burkgrafe zu Nuremberg Bekennen offenlich mit disem briene das wir mit wol
bedachtem mute vnd rechter wizzen den allerdurchleuchtigsten fursten vnd herren hern karl Romischen keis(er) zu allen
zeiten merer des Reichs vnd kunig zu Beheim vnsern lieben gnedigen herren sulcher fruntschafft vnd ee von der
wegen der durchleuchtige furste her sigmund sein son die hochgeborne Junkfrawe katherinen vnser tochter zu
elichem weibe vnd sie yn wider zu elichem manne solte genomen haben vnd auch des vberwettes hunderttausent
gulden als das von vns an beiderseit dorvber gelobt vnd vorbrieuet ist ledig vnd los gelazzen vnd gesaget
haben vnd lazzen vnd sagen yn der allersachen vnd slechticlichen quit ledig vnd los Also das er vnd seine er=
ben furbas mit demselben seinem sone tun mugen was sie wollen ane hindernusse vnd on alles geuerde.
Mit vrkund ditz brieues vorzigelt mit vnserm grozzen anhangenden Ingesigele Geben zu Eger nach Crists
geburt dreyzehenhundert Jar dornach in dem funffvndsibenzigstem Jare des nehsten sunabendes nach des
heiligen Crists tage.