Ich perchte vnd wilhelm von der leype Bekennen fur vns vnd vnse erben vnd tun kunt offenlich mit disem briue
allen den die yn sehen oder horen lesen das wir mit gutem berotenem mute vnsem gnedigem herren keiser karle
kunig wenczlawen von beheim hern sigmunden vnd hern Iohansen desselben vns(er)s herren des keisers sonen markgra
fen zu brandemburg recht vnd redlichen vorkaufft haben vnd verkauffen mit craffte dis briues die newe mule
das haws zu snaaw vff dr hauel gelegen mit dorffern vnd allen andern zugehorungen als wir das yczunt ynnehabn
vor achtehundert mark brandemburgisches silbers vnd gewichtes oder vor ygliche mark acht vnd sechczig behemische
grosse zuczepten vnd fur cwene hengste oder funffczig mark brandemburgisches silbers dasselbe gelt mugen vns
oder vnse erben die egenant(en) vnse herren oder ire erben bezalen wenne sie wollen vnd sullen vns die bezalunge zu
gute tun zum Berlyn vnd nicht gestaten das vns dasselbe gelt von yemanden vorsprochen bekumert oder gehind(er)t
werde in dheinerleis vnd wenne sie vns bezalet haben so sullen vnd wollen wir yn oder irem hawptmanne in der
marken dem sie das empfelhen das obgenant(e) haws die newe mule mit aller zugehorunge bynnen den nehsten vier
tagen nach der bezalungen abetreten vnd ledichlichen ynantworten vnd auch sulche briue widergeben die wir
daruber haben on geuerde vnd on allerleie widerrede Als wir das auch zutunde den egenant(en) vns(er)n herren munt
lichen gelobt haben in guten trewen vnd ane geuerde vnd haben des zu vrkunde vnse beide Ingesigele an disen
brieff tun hengen Geben zum Berlyn nach crists geburt drevzehenhundert Iar dornach in dem funff vnd siben
czigstem Iare des nehsten freytages nach sant mertyns tage