Wir die Burgermeister der Rat die zunftmeister vnd die burg(er) gemeinlich der Stat zu Sletstat Tunt kunt allen
den die disen brief sehent oder horent lesen Das wir von geheisse des allerdurchluchtigsten fursten vnd h(er)ren h(er)rn
karle Romischen keysers zu allen ziten mer(er) des Richs vnd kuniges ze Beheim vnsers lieben gnedigen h(er)ren
vnd mit wissen vnd willen aller kurfursten des heiligen Richs mit truwen gelobet haben vnd liplich zu den heilige(n)
gesworn dem Edeln h(er)rn Bvssko von der witzmule vnderlantvogte zu elsaz vnserm lieben gnedigen h(er)ren von
wegen vnd zu handen des allerdurchluchtigsten fursten vnd h(er)ren h(er)rn wentzlaus gekornen Romischen kuniges
vnd kuniges zu Beheim der Jm diz enpholhen het von vns ze nemende wand er selb(er) zu disem male zu vns
nit kumen mag Jn fur eynen Romischen kunig ze habn vnd ze haltn alle vnser vnd sine lebetage Vnd
wanne der obgenante vnser h(er)re der keyser von todes wegen abegat daz got lange wend oder daz Rich vfgibet
So sullen vnd wellen wir in guten truwen dem egenanten vnserm h(er)ren kunig wentzlaen gehorsam vnd
gewartend sin vnd gewarten alle vnser vnd sine lebetage Alse eyme Romischen kunige zukunftegem
keyser vnd alse vnserm rehten h(er)ren ane alle argelist vnd geuerde wir sullen vnd wellen ouch in des obgen(anten)
vnsers h(er)ren des keysers huldunge vnd truwen nu vnd harnach sin vnd bliben ane alle geuerde Alse lange
alse er gelebet oder biz daz er daz Rich vfgibet Vnd des zu bester stetikeit hant wir vnsere Stat Jngesigel
fur vns vnd vnser nachkumen an disen brief gehangen Der geben ist zu Sletstat Nach crists
geburte Tusent druhundert in dem Sehs vnd Sibentzigsten Jare vf den nehsten Sunendag vor
Sancte Margarethen tag