Wir Lwpolt von gots gnaden Herczog ze Osterreich ze Styr ze Kernden vnd ze Krain Herr vf der Windischenmarch
vnd ze Portenow Graf ze Habspurg ze Tyrol ze Phyrt vnd ze Kyburg Marggraf ze Burgow vnd Lantgraf ze Elsas Bekenen
vnd tun kunt offenlich mit disem brief allen den die In ansehent oder horent lesen daz wir dem allerdurluchtigsten fursten vnd
hren hrn Wenczlawen Romischen kunig zu allen ziten merer des Richs vnd kunig ze Beheim vnserm gnedigen hren gelobt
vnd ghayssen haben geloben vnd ghayssen mit kraft ditz briefs in guten truwen an alle geuerde daz wir denselben vnserm hren
kunig Wenczlawen die weil er lebet zu einem Romischen kunig nennen halden vnd haben sullen vnd wellen vnd wellen vnd
sullen vnsere Lehen von Im als von einem Romischen kunig enphahen hie zwischen vnd dem heiligen Pfingsttage der nw
schierist kumpt an geuerde vnd Im bey ligen beygestendig vnd zu demselben Romischen Rich beholfen sin vnd sullen Im dasselb
helfen zebeherden vnd zebehalten mit aller vnser macht vnd mugen gen allermenclich niemant vsgenomen der In da irren
oder hindern wolt in dhainen wise mit vrkund ditz briefs Geben ze Baden in Ergöw an Suntag in der vasten so man
singt Reminiscere Nach Cristi gepurde Druczehenhundert iar darnach in dem Nwn vnd Sibenczigisten Jare.