Wir Wenczlaw von gotes gnaden Romischer kunig zu allen zeiten merer des reichs vnd kunig zu Behem
Bekenne fur vns vnd vnser nachkomen kunige zu Behem vnd tun kunt offenlich mit disem briue allen
den die yn sehen oder horen lesen das wir haben angesehen grosse achtber merkliche getrewe vnd nutze
dienste die der Edel Thime von Coldicz vnser Hauptman zu Behem Rat vnd lieber getrewer dem Aller
durchluchtigstem fursten vnd herren hern Karlen seliges gedechtnisses etwenn Romischem keysere vnd
kunige zu Behem vnserm lieben herren vnd vater offte vnd dicke vnuerdrossenlich getan hat vns
auch tegelichen tut vnd er vnd seyne erben noch tun sullen vnd mugen in kunfftigen zeiten vnd
haben ym drumb vnd seynen erben mit wolbedachtem mute rechter wissen vnd kuniglicher macht
zu Behem was er der pfantschaffte die er von vns ynnehat mitnamen zu pyrn kunigsteyn vnd was
darzu gehoret Gorlebe hoerswerde purkow luskouicz die gulde zu Budissin Gorlicz Sittaw vnd zum Lu=
ban genossen vffgehaben oder yngenomen hat er oder die vorgenan seyne erben furbasmer geniessen vffhe=
ben vnd ynnemen werden die weyle dieselbe pfantschafft weret gnediclich gegeben durch der vorgenan yrer
dienste willen vnd geben ym vnd denselben seynen erben vorgenan auch die genglich luterlich vnd gar fur
vns vnd die vorgenan vnser nachkomen kunige zu Behem mit craffte ditz brieues versigelt mit vnser Ma=
iestat Ingesigele der geben ist zu Bresslow nach Criste geburte Drezechenhundert Iar dornach in dem Eyn
vnd achczigstem Iare an sente peters vnd pauls tage der heiligen zwelffboten Vnser reiche des Behemischen
in dem Achzehendem vnd des Romischen in dem funfften Iaren
Ad man(datum) d(omi)ni Regis d(omi)no Henrico de
duba res(idente) com(m)is(sum) Ep(iscop)us Lubucen(sis)