Wir Ruprecht Graue zu Nassaw bekennen offenlichen in disem briene das der Allerdurchluch=
tigiste furste vnd herre her Wenczlaw Romischer kunig zu allen zciten merer des Reiches vnd kunig zu
Behem vnser lieber gnediger herre von vnsir wegen heinrich von nassaw vnserm lieben getrewen
gericht vnd bezalt hat zu prage vier Tusent gulden als wir ym gelihen hatten vnd darfur
vns gesprochen hant der hochgeborn herzog heinrich zu dem Brige her Cunrad von kray her peter
von wartemberg her marquart von wartemberg her hanke von der duben her pothe von Czasto
lowicz her hinke Berka von der duben her Otte von Bergaw her dietrich von Janowicz derselben
vier Tusent gulden wir den vorgenanten vnsern herren den kunig vnd die vorgenan burgen sagen
quyt ledig vnd los mit disem offenem briene dann den schaden den wir haben gehabt der vier Tusent
gulden des seyn wir beliben bey gnaden vns(er)s herren des kuniges vorgen(ant) slechtticlich an alle argelist
vnd an alle ander vordrunge vnd sullen vnd wollen wir vnd geloben in guten trewen den brieff den
wir vber die vier Tusent gulden haben vnd da die burgen ynne steent die hie vorgeschriben steent
zustund antwerten vnd geben Luczen zun roidel Burger zu frankenford vff dem meyne vnd sal
der brieff furbas keyn macht haben vnd han des zu vrkunde vnser Ingesigel an disen brieff ge=
hangen das wir bey dem egenanten heinrichen gegen prage gesant haben vnd zu merer sicherheit han
ich heinrich von nassaw vorgenan wann ich das gelt empfangen han mein Ingesigel zu meynes
vorgenan herren Graff ruprechts Ingesigele auch an diesen brieff gehangen vnd han darzu gebeten
wolffen von sachsenhusen das er zu geczeugnisse sein Ingesigel bey meynes hren vnd minem Ingesi=
gele gehangen hat des ich wolff von sachsenhusen vorg(enant) bekenne das das war ist Gegeben zu pra=
ge an dem nehsten Sontag vor sant Gallen tage nach Cristis geburte dreyczenhundert Jar dornach
in dem Czwey vnd Achtczigistem Jare