Wir Wenczlaw von gotis genaden(n) Bisschoff czu Breslaw Ludewic von gotis genaden(n) czum Brige vnd Heynrich von s(in)e(n) g(e)nad(en) czum Slesien Ruprecht vnd Wenczlaw gebruder von denselbin gotis genaden(n) Herczogenn czu Slesien vnd herrn czu
legnicz bekennen vor vns alle vnse erben vnd nochkomlinge Herczog(en) doselbst vnd tunkund allin die dezin brieff sehin adir horin lesin Wann kentlich offenbar ist das slegir gedechtnisse der durchluchte furste her Johannes czu der czeit kunig czu Behem(n)
das Herczogthum vnd furstenthum czu Breslaw mit alle sinen herlickeytenn vnd rechtenn die stete Breslaw Neubenmarkte die manschaft doselbst vnd was czu demselbin furstenthum vnd Herczogthum czu Breslaw gehorit nichts vsgenomen an sich an das
kunigrich vnd an die crone czu Behem(n) recht vnd redlich gebracht hat eim sinen erbenn vnd nochkom(m)en kunigenn czu Behem(n) erblich vnd ewiglich czubesiczen vnd wann ouch diczselbin Herczogthum furstenthum herschafte stete lande vnd lute vnd alle ire rechte vnd czu
gehorin der eegenant(e) kunig Johan vnd noch em selgir gedechtnisse der durchluchtigste furste her Karl czu der czeit Romisch(er) keyser vnd kunig czu Behem(n) als eyn kunig czu Behem(n) besessen der eegenant(e) s(in) vater vnd er lebin yn nucze vnd yn gewere gehab(t)
hat ane alle ansproche ynnegehabt vnd besessin habin vnd die vff den allirdurchluchtigst(en) fursten vnd hren hrn Wenczlaw Romisch(en) kunig czu allin czeit(en) merer des riches vnd kunig czu Behem(n) desselbin keysers karls sone als vff eynen kunig czu Behem(n) vnse
liebin genadig(en) erbhren vff das kunigrich vnd die crone czu Behem(n) vnse obirste natuirliche vnd erbliche lehinherrschafte geerbit sind recht vnd redlichin sterbrocht habin als ouch derselbe vnse hre der Romisch(e) kunig als eyn kunig czu Behem(n) fur sich sine erbenn
vnd nochkom(m)en kunige czu Behem(n) die eegenan(ten) Herczogthume herschafte stete lande lute vnd gut(er) mitsampt der stat lande vnd gebiete czu Namsla vnd ire czugehoringe vff dezin hutig(en) tag yn rechtir besiczunge vnd gewislich nucze vnd gewere ynnehat vnd
besiczit ane ansproche vnd ane allirley hindernisse vnd wann ouch die obgenant(en) furstenn vnd Herczog(en) vnse vetere vnd eldernn vor sich vnd ire erbenn vnd ouch wir vor vns vnd vnse erbenn vns vormals allir rechtinn vorderunge anevordirunge vnd ansprechung
ab die vnse eldernn adir wir vnse erbenn adir etliche nochkom(m)en an dem vorg(en) Herczogthum furstenthum vnd herschafte czu Breslaw dem stetenn Breslaw Neubenmarkt Namsla an dem furstenthum(m) vnd Herczogthum(m) czu Swydnicz vnd czum Yauwor
vnd ire czugehoringe vsgenomen alleyne Nymps stat lande vnd gebiete die von vns desselbin vns(er)s hr(e)n des kunigis vnd siner erbenn pfandschaft sin vnd doran wir vnse losunge habin als das yn andir(n) briefenn begriffin ist die wir von demselbin
vns(er)m hr(e)n dem kunige vnd sinen erbenn habin diczselbich denselbin briefenn gestalt hatin adir habin mochten gar genczlich vnd offinlich vorczigin vnd ein ouch vormals redlichin globt habin doran nymmir dheine vorderunge adir ansproche ewichlich czugewinnez
von ymande geistlich adir werntlich(en) magin habin wir vorg(en) Herczog(en) vnd furstenn alle vnd vns iglichir fur vns vnd alle vnse erbenn vnd nochkom(m)en die das kentlich anruren mag vns von neuwens dorczu vnd vorczien offinlich genczlich luterlich vnd ane arge
list mit craft dis briefs allir solichir vorderunge rechtis anevordirunge vnd ansprechenn ab wir dheine an dem eegenant(en) Herczogthum vnd furstenthum czu Breslaw der stadt doselbst der stat Neubenmarkt czu Namsla dem Herczogthum czu Swydnicz vnd
czum Yauwor vnd an allin iren manschaftenn vnd an iren czugehorungenn gehab(t) hatin adir habin adir gewinn(en) mochtin yndheinen weys vsgenomen der eegenant(en) pfandschaft der stat vnd landis czu Nymps an dem wir vnse losunge habin vnd habin ouch
darobir deme obg(en) allirdurchluchtigst(en) fursten vns(er)m liebin genadig(en) hr(e)n hr(e)n Wenczlaw Romisch(en) kunige vnd kunige czu Behem(n) als eym kunige czu Behem(n) sinen erbenn vnd nochkom(m)en kunigenn czu Behem(n) von neuwis globit vnd globin yn gutem
truwinn yn eydis weyse mit craft dis briefs ane argelist vnd ane geverde das wir vnse erbenn vnd nochkom(m)en die das anruren mag von wegin der obgenant(en) Herczogthum(m) furstenthum(m) vnd herschaftenn stete lande lute vnd gebietenn czu Breslaw czum
Neubenmarkte czu Namsla czu Swydnicz vnd czum Yauwor vnd ire czugehoringe vsgenomen Nymps als dovor begriffin ist nymmir dheinerley anevordirunge vorderunge adir ansproche habin adir gewinn(en) sullin adir wellin noch vns ouch doran mit
dheinerley geystlichin adir werntlich(en) rechte adir gerichte behelfin adir dornoch stellin adir stin sullin yndheinen weys ane argelist vnd ane allis geverde vnd were es sache das ymmir yndheinen czeitenn ewichlichin dheinerleye hantschrifte brive adir jnstru
ment von yemand furkemen adir furbracht wurdin mit dem der eegen(ante) vnse hre der kunig sine erbenn adir nochkom(m)en kunig(en) das kunigrich vnd die crone czu Behem(n) anbeeydingt gemanet adir angesprochin mochtin wirdin von wegin der obg(en)
Herczogthum furstenthum stete vnd lande czu Breslaw czum Neubenmarkte Namsla czu Swydnicz czum Yauwor adir ire czugehorungenn vsgenomen Nymps als vorbegriffin ist diczselbin brive wo die czu lichte adir vorkomen sullin ab vnd hernoch yn kunf
tigin czeitenn ewichlichin tod vnd uncreftig vormehrt vnmogelich vnd abesin vnd kyne craft adir macht an dheiner stath yn gerichte vnd vszwendig gerichtis geystlich adir werntlich habin noch gewinn(en) vnd sich sul mit sulchin brivenn wedir vnse eegen(anten) hr(e)n die
kunige kunigrich vnd croney czu Behem(n) nyman an dheiner stath behelfin magin vnd suliche hantschrift vnd brive sullin adir mogin dem obg(en) vns(er)m hr(e)n dem kunige sinen erbenn nochkom(m)en kunigenn vnd der croney czu Behem(n) noch ymande von
iren wegin keyne irrunge bekum(m)irnisse hindirnisse adir schaden machin tun adir bringin yndheinen weys ane argelist vnd ane allis geverde des czu clugim bekentnisse habin wir mit wissin vns allir dezin brieff vorsegilt mit vns(er)n yngesigelin Gegeb(en) czu
Prage noch cristis geburde vns(er)s liebin hr(e)n Tausind druyhundirt Jare ym dryundachtczigst(en) Jare am heylig(en) obirstinttage