Wir Lamprecht von gots gnaden Byschoff ze Babemberg Bekenn vnd tůn kunt offenlich an disem brife Wann der Allerdurchleuchtigst
furste vnd h(er)r h(er)r Wenczlaw Romischer künig czu allen czeiten merer des Reichs vnd künig ze Beheim vnser lieber gnediger h(er)r vns
vns(er)m Stifte ze Babemberg vnser land vnd lewt durch vns(er)r dinst(e) willen die wir seinem vater seligen dem Allerdurchleuch
tigsten fursten vnd h(er)rn h(er)rn karl Romischem keyser dem got gnade vnd auch seinen gnaden langezeit getan haben vnd teglich tůn
wollen in seinen schutz vnd schirme gnediglich emphangen hat vnd vns globt hat vnser land vnd lewt zeschutzen vnd schirmen zu
vns(er)m rechten wider allermeniglich ongeuerd als daz in seinen küniglichen brifen dy er vns daruber geben hat voliglicher begriffen
ist vnd darumb so verhengen vnd globen wir in guten trewen ongeuerd daz wir dem g(e)nanten vns(er)m gnedigen h(er)rn h(er)rn Wencz
law Romisch(e)m künig vnd künig zu Beheim seinen Amptlewten vnd vntertan von seinen wegen den er daz beuelhen wirdet alsoft
des not sein wirdet alle vnd iglich vnser Sloss vesten vnd Stete zu allen seinen noten offen sullen vnd welln daz er sein volk
vnd lewt darein seczen vnd darein behalten mage sich dauon zehelffen vnd zewer(e)n wider allermeniglich nyemands vssge
nomen vnschedlich doch vns vnd den vns(er)n an vns(er)m vesten Slossen vnd and(er)n sachen on geuerd Auch so sullen vnd well(e)n
wir dem g(e)nant(e)n vns(er)m h(er)rn vnd seinen Amptlewten von seinen wegen mit all(e)n vns(er)n landen lewten Slossen vesten vnd Ste
ten zu allen iren noten wider allermeniglich als oft des not sein wirdet beholffen sein vnd beygesten noch all(e)m vns(er)m ver
mügen ongeuerd Vnd gebieten darumb allen vnd iglich(e)n vns(er)n Amptlewten vnd vndersezzen vns(er)s Byschtums zu Babem
berg daz sy dem g(e)nanten vns(er)m gnedigen h(er)rn seinen Amptlewten vnd vntertan von seinen wegen den er daz beuelh(e)n
wirdet wider allermeniglich beygestendig vnd beholffen sein nach all(e)m irem v(er)mogen vnd in auch alle vns(er) Sloss vesten
vnd Stete zu all(e)n iren noten offen vnd lewt vnd volk darein seczen lassen alsoft des not sein wirdet sich dauon zehel
fen vnd zewer(e)n on vns(er)m vnd iren schaden ongeuerd Vnd des ze vrkund geben wir disen brife v(er)sigelt mit vns(er)m
anhangendem Insigel Vnd geben ze Prage am mitwoch vor lucie virg(inis) Anno d(omi)ni Mill(es)imo Trecente(si)mo Octuage(si)mo Sexto