Wir Ladisla von gotes gnaden herczog zu Opul zu Welun czu Cupa an Dobrin (etc.) Bekennen fur vns vnser erben vnd nachkomen vnd tuen kunt offenlich mit disem briue allen den die yn
sehen oder horen lesen das wir dem hochgebornen fursten herren Josten Marggrauen vnd herren zu Werthn vnserm liben swager vnd seinen rechten erben Marggrauen vnd herren zu Werthn mit
wolbedachtem mute gutem vorrate vnd rechten wissen recht vnd redlich vorkaufft vnd abgetreten haben vorkauffen vnd abtreten mit crafft ditz briues an rechter kauffschafft herlich zuhaben
zu halden vnd genzlichen zu besiczen ym seinen rechten erben nachkomen Marggrauen vnd herren zu Werthn die herschafft das ist die stat Jegerdorff mit der manschafft dorffern landen vnd
lewten lehen geistlichen vnd werntlichen vnd allem dem das dorzu gehoret besucht vnd vnbesucht nichtes vsgenomen das an derselben stat Jegerdorff an dem ganczen weichbilde herschafft
vnd lande doselbest zu gehoret jn aller der masse als das der eygn Marggraff Jost vormals selber ynne gehabt hat vnd als das von ym vnd herczog Hansen dem alden vnd dem jungen von
Troppaw an vns ist komen vor eine genante summa geldes das ist Eylff tusent vnd czweihundert schock denn wir iszunt wol vnd genczlich beczalet sein czwetusent dreihundert dreiczen schok vnd
czwenczig grosse prager pfennyge vnd ist auch zu wissen vmb die beczalunge funffhundert schocke grosser als von wegen der lehen des halben teiles der vesten zu lobenstain an der obgen(anten)
summa geldes das wir vnd vnser erben vnd der eygn Marggraue vnd seine erben die halden sullen jn slicher masse als das jn andern vnsern briuen die doruber gegeben sein eygentlich ist begriffen
Vnd furbas vmb das vberige gelt das ist Acht tusent czweihundert dreiczen schok vnd czwenczig grosse prager pfennyge vnd eynige desselben geldes der vorgen(ante) Marggraff Jost vnd seine rechte
erben Marggrauen vnd herren zu Werthn vns vnd vnsern rechten erben geben leysten vnd beczalen sullen tusent schok der eygn grossen groschen hie vnd dem nechsten palm tage vnd dornoch
tusent schok derselben prager grossen vff sant Jorgen tag der schirest komet vnd sullen vns die beczalunge tuen jn der stat zu Jegerdorff vnd von danne sicher geleiten vnd antwurten jn
die stat zu wenyge Glogaw an alles geuerde Als sulche beczalunge derselben czweitusent schocke jn andern vnsern briuen die vns doruber gegeben sein lewterlich ist begriffen vnd dornoch
vff sante Michels tag der schirest komet Eylffhundert eynvnddreissig schok vnd sechs grosse Vnd furbas dornoch von dem andern sante Michels tage vber funff Jare die schirest noch enander
volgen ye vff sant Michels tag Eylffhundert eynvnddreissig schok vnd sechs grosse zu beczalen zu Jegerdorff vnd furbas sicher geleiten vnd antwurten jn wenygen Glogaw als vorgeschriebn
steet an alles geuerde Doch also wir obgen(anter) herczog ladisla vnd vns(er) erben sullen dem borgen(anten) Marggraff Josten vnd seinen erben Marggrauen vnd herren zu Werthn der vorgen(anten) summen des
geldes Eilff tusent vnd czweihundert schok rechte gewere sein vnd tun als recht ist kegen herczog hannus von Troppaw vnd seinen erben vff die vorgen(ante) lant Jegerdorff vnd doruff haben
wir auch dem eygn Marggraff Josten fur sich seine erben vnd nachkomen Marggrauen vnd herren zu Werthn der eygn stat Jegerdorff herschafft manschafft lehenschaft vnd lehen geistlich
vnd werntlich land lewte guter vnd was dorzu gehoret nichtes vsgenomen Als vorbegriffen ist abgetreten yngegeben vnd yngeantwurtet vnd vns der genzlich vorczegen vnd vns vnsern
erben vnd nachkomen doran keynerleye forderunge recht noch anesprache behalden jn deheynen weis an alles geuerde Des vrkunt ditz briues vorsigelt mit vnserm anhangenden Jngesigel
Geben zu Jegerdorff noch cristus geburt dreiczehenhundert Jar dornoch jn dem Newenczigsten Jare des nechsten montags noch dem suntage als man jn der heiligen cristenlichen kirchen
singet jn der vasten