Wir Nyclas der Rycht(er) Diterich der Burg(er)maist(er) und di gesworn alle dar nach uberal di Gemain der
stat ze Znoym tůchen offenwar allen den di disen brif sehen lesen oder horen lesen daz wir von
dem geschefte und gebote unsers liben herren des hochgeborn chunig Johansen von Behem und von
Polan und Graven von Lucemburch ghaizzen und gelobt haben mit ewen an aydes stat dem edel
len hohen fursten Herzogen Heinrichen von Charnden Graven von Tyrol stete helfen ze haben
alle der taiding und gelubde di zwischen unserm vorgenanten herren und im geschehen sint als
diselben unsers liben herre hantfeste sagent di er im dar uber geben hat Und nemlich daz
derselbe herzoge furmunt und Gehabe sein sol ob ez ze schulden chume uns(er)s egenanten herren
Chunig Johansen chinde di er iezunt hat oder noch gewinnet Der spintnusse und daz gelubde
haben von uns in genome an des vorgenante(n) herzogen stat di ersamen herren Maist(er) Heinrich d(er)
Probst von Volchenmarkt und her Woldemar von Purchstal und dar uber zu eine(r) urchunde
habe wir im geben disen brif mit dem anhangundem unser stat Insigel ze Znoym diser
brif ist geben Nach xp(ist)e geburt Dreuzenhond(er)t iar im acht und zwainzgustem iar an sand
Stephans tag des Martrer als sein lichnam funden ward