Wir frederich wilhelm vnd Jörge gebrudere marggrafen czu myssen vnd lantgrafen in doringen Bekennen offinlichin vnd thun kunt mit
disem breffe allin den die yn sehin adir horin lesin das getedinget vnd uffgenomen ist czwisschin dem allirdurchluchtigsten fursten vnd
herren h(er)n wenczslawen Romischin konige czu allin czeiten merer des Richs vnd konige czu Behem vnsim libin gnedigin herren
von einer vnd vns von der andirn syte vmb suliche anspruche die wir an yn gehatt habin von der czehen tusend schogk
vnd der stete pirne vnd Brvx slos vnd stat wegin die vns vorscribin sin vnd ouch vmb die vorfessin czinse vnd koste schadin
vnd gerunge die wir bis her daruff getan habin Also das der selbe vns(er) gnediger h(er)re der konig vns die stete Brvx vnd
pirne von stadan inenntwortin sal vnd vns tusend schog geldis an muncze vnd gulden daran bewisen vnd was an den tusend schogken
gebreche da sellis an andirn gewissin gulden vnd muncze bewisen da by in der nehede nach deme als vnse h(er)re der konig es bewi-
siget vnd er vns vormals das vorscribin habin vnd vns(er) herre der konig sal bestellin vnd schaffin das vns die gulde vnd
rente von stadan vnd furbasmer alle iar ane hindir-volge vnd gefalle So vmb das slos czu Brvx das sal vns vns(er) herre der
konig inlossen e he vnd disen nehstin wynachtin ouch inschaffin vnd bestellin das vns das geendit werde ane borgen were
abir das vns(er) herre der konig das in diser czeit nicht geendin konde ane geuerde vnd der erwirdiger in got vatir er lamprecht
Byschoff czu Bamberg vns(er) liber herre vnd frund vnd der hochgeborn furste er wilhelm marggraue czu myssen der eldir vns(er) liber
vetter irkennen das das vngeuerlich were vnd vnsim h(er)ren den konig das redelich gescheffe beneme So sullin die selbin vns(er)
h(er)re von Bamberg vnd marggraue wilhelm von myssen der eldir vns(er) vetter macht habin die czeit czu erlengen also das vns
binnen der czeit die sie vorlengen das slos vnuorczogentlich geendit werde vnd vns dar queme geue Ouch ist getedinget
vmb die vorfessin czinse vnd alle koste gerunge vnd schadin die wir daruff bis her getragin vnd getan habin also das vns(er)
herre der Byschoff von Bamberg vnd vns(er) vetter marggraue wilhelm der eldir darvmb vssgesprochin vnd vns des gescheidin
habin das der obingnante vns(er) gnediger herre der konig vns noch driczehenhundirt schog grosschin prager muncze daror-
czelin vnd beczalin sal uff sente Jörgin tag nehst czukomende vnd damite sal alle koste gerunge vnd schadin die wir daruff
getan habin vnd ouch die vorfessin czinse genczlichin gericht vnd beczalt sin bis uff disen tag ouch so sullin die egnanten
slos vnd stete vnsim h(er)ren dem konige offin sin gein allirmenglich nach lute siner maiestatbreffe die wir darobir ge-
geben sint vnd globin ouch die obingnantin sachin die vor begriffin sint stete gancz vnd vnvorrugket czuhaldin vnd czufulfuren
ane geuerde vnd argelist des czuorkunde habin wir des erwirdigin in got vatirs h(er)n lamprechtis Byschoffis czu Bamberg
vnsis libin h(er)ren vnd frundis vnd des hochgeborn fursten marggrafen wilhelms von myssen vnsis libin vetters vorgnant Jnsigele
an dysen breff lassin hengin die wir darvmb gebetin habin vnd der igund wir an gebrechin wern wir des vnsin igund
hie vns nicht enhabin Gegebin czu nurenberg nach gotis geburte driczenhundirt Jar darnach in den sebin vnd nwn
czigistin Jare an dornstage nach sente dionisii tage