Wir Benedict von der yben vnd Wenczlaw von der yben gebrude(r) Bekennen vnd tun kunt offenlich mit dysem briue Als vns der
Allerdurchleuchtigiste furste vnd h(er)re her Wenczlaw Romischer kunig zu allen czeiten merer des Reichs vnd kunig zu Beheim
vns(er) liber gnedig(er) h(er)re das Gerichte im Seiffen zu heinrichsdorff bey Ronberg gelegen mit Siben marken czinses vnd allen and(er)n
czugehorungen das wir von dem Edeln h(er)rn Berken vom Hohnstein als ein frey gut gekauft haben durch vns(er) bete vnd dinste
willen z(u) rechtem manlehen gelihen vnd gereicht hat Als das seine kunigliche maiestat briue die er vns doruber ge
geben hat eygentlichen aws weisen Also mit wolbedachtem mute vnd rechter wissen So haben wir obgen(anter) Benedict vnd
Wenczlaw gelobt vnd verheissen geloben vnd verheissen mit disem briue mit vnsern guten trewen fur vns vnd vnse(r)
Eliche leibserben das wir dem egen(anten) vns(er)m gnedigen h(er)ren kunig Wenczlawen vnd seinen Nachkomen kunigen zu
Beheim von dem egenan(ten) Gerichte czinsen vnd iren zugehorungen dinen wollen vnd sollen gleich andern
mannen in dem Lande zur Syttaw gesessen als das von alders herkomen vnd gewonheit ist an alles geuerde
vnd argeliste Vnd des zu einem waren vrkund So hab ich obgenan(ter) Benedict mein Infigel an dysen brief
mit rechter wissen gehangen Der gegeben ist zu Prage des nechsten dinstags nach sant lorenzcen
tage Nach Cristes geburt virczehenhundert Jar vnd dornach in dem funften Jare