Ich habart hertemberg Ritter gesessen zum karlsperge Bekenne vnd tun kunt offenlich mit disem briue fur mich vnd alle
mein Erbn vnd nachkom(en) allen den die jn sehen oder horen lesen vmb die gnade die mir mein gnedig(er) h(er)re der Allerdurchleuch
tigiste furste vnd h(er)re her Wenczlaw Romischer kunig zu allen czeiten merer des Reichs vnd kunig zu Behem getan hat
das er mir vnd meinen erbn vnd nachkom(en) alle wochen gegeben hat czwey schok gross(er) Behemischer grosshen vf dem
Wechsel zum Reichenstein vfczuhebn vnd einzunemen Also mit Wolbedachtem mute vnd mit rechter Wissen so hab jch
mich gen des egen(anten) meins h(er)ren des kunigs gnaden Verbunden das ich seinen gnaden mit dem slosse karlsperg vnd nymad
and(er)s gewartende sein sol zu allen seinen noten doch an meinen vnd meiner Erben kost vnd schaden Vnd Wenn dann
der egen(ante) mein h(er)re der kunig oder sein Erben vnd nachkomen kunige zu Beheim das egen(ante) sloss karlsperg Von mir
oder Von meinen Erben vnd nachkom(en) lozen Wil So sol ich es seinen gnaden an alle widerrede vnd vnverczogenlichn
zu lozen geben vnd antwurten mit den briuen die ich dem dozuber han Also das mir sein gnade sol geben newntausent
Sibenhundert funf vnd sibenczig guld(en) Vngrischer vnd Behemischer als denn die briue vsweisen die der Edel her
Johans lantgraf zum lewthemberge dozuber gehabt hat vnd die ich jm vs seiner hant gebracht han an allen
vfslag Vnd Wenn man die lozunge tun Wil so sol man mich es vorhyn ein moned lassen Wissen Vnd aller vor
beschribner sachen gelobe ich habart obgen(ant) bey meinen trewen vnd eren an eines eydes stat veste vnd gancze
getrewlich zuhalten das in disem briue geschriben steet an alles geuerde mit vrkund ditz briues versigelt mit
meinem Anhangendem Jnsigel vnd des zu einem geczengnisse So han ich gebeten den Erbn vnd vesten mar
schiken vom hradek zur lopathagesessen das er sein Jnsigel bey das meine an disen brief hat gehenget der
geben ist zu prage des nechsten dinstags nach sant lorenczs tage Nach crists geburt Virczehenhundert jar
vnd dornach in dem funften Jare