Wir Wenczlaff von gotes gnaden Romisch kunig zu allen czeiten merer des Reichs vnd kunig zu Behem Bekennen vnd tun kunt offenlich mit disem
briue allen den die jn sehen oder horen lesen das Wir von sulcher czweytracht wegen stosse vnd bruche die czwischen vns an eynem vnd den hochgebornen
friderich wilhelm vnd friderich marggrafen zu meissen vnd lantgrafen jn doringen an dem andern teile sint fur vns vnd aller vnser furstentum lande
Stete Slosser merckte vnd dorffe wo die gelegen vnd wie die genant sint jnwohner helffe vnd dinst vnd besunder alle die die durch vnsern willen tun vnd
lassen wollen jn welchen wirden adel oder wesen die seyn geistlich oder werltlich nymand vszgenom mit den egen(anten) friderich wilhelm vnd friderich vnd allen
jren furstentumen landen Steten Slossen merckten vnd dorffern wo die gelegen sint geistlich oder werltlich nymand vszgenom eyn fruntlich vnd gutlich steen
vfgenomen haben vnd nemen das vf jn craft dicz briues vnd rechte wissen dasselbe gutlich vnd fruntlich steen czwischent vns beyderseyt weren sol von sand
mertens tage schirst komende bis vff den heiligen pfingsttage nechst dornach folgende denselben tage vs vnd vs vnd geloben ouch den vorgen(anten) marggrafen
zu meissen vnd lantgrafen jn doringen vnd zu jren handen den Edeln heinrichen Ryssen von plawen den eltern genant von Brog Burthern von vynall
vnd hansen von polencz vnsir vnd des Reichs liben getrewen mit wolbedachtem mute gutem vorrate vnd rechte wissen jn craft dicz briues bey vnsirn kunig
lichen worten vor vns vnd aller vnser furstentum vnd lande vndersessen vnd jnnhone helffe vnd dinst das egen(ante) fruntliche vnd gutliche steen mit den egen(anten)
marggrafen die egen(ante) czeit vs vnd vs stete gancz vnd vnuerruckt zuhalden vnd zuuolfuren an alle geuerde vnd argelist vnd wo es sache das die egen(anten)
marggrafen vnd jre manne vnd vndersessen jn dem egen(anten) fruntlichen vnd gutlichen steen von vnsirn mannen vnd vndersessen angegriffen vnd bestediget wurden
darzu sullen wir mit macht tun das sulchen name genczlich vnd gar widergekert werde bynnen virczehen tagen nach der manunge vnd wern die selben
jn vnsirn landen beslosset vnd gesessen fur dieselben sullen wir czihen vnd sie darzu brengen das sie die egen(anten) name den obgenan(ten) marggrafen von meissen
heinrichen Burthern vnd hansen vnd den die bestedigt wern genczlich vnd gar widerkeren darzu sie vns ob des not seyn wurde mit jrer macht ge
trewelichen beholffen seyn sullen als balde sie von vns ermanet werden wo ouch sache das die die der egen(anten) marggrafen lande lewte vnd vndersessen an
griffen vnd bestedigten jn vnsirn landen nicht beslosset noch gesessen sunder rawbe wern so sullen wir bestellen mit vnsirn amptlewten vnd Steten
das man dieselben wo man die jn vnsirn landen ankomet mit jrem leibe vnd gute vfgehalden werden vnd das dieselben jn vnsirn landen nymand huse
noch jn furderunge tu heimlich noch offenbarn jn keynerleis derselben rawbe vnd bestedige ouch die egen(anten) marggrafen feinde seyn sullen gleicher
weis als wirselber vnd sullen sie ouch jn jren landen nicht husen noch herbergen sunder mit jren amptlewten anwalden vnd Steten schaffen vnd be
stellen das dieselben rawbe jn jren landen mit jrem leiben vnd gute vfgehalden bekumert vnd gestraffet werden wo man sie an komet als sulch
schedlicher lewte recht ist vnd wo es sache das die die der egen(anten) marggrafen lande lewte vnd vndersessen angriffen vnd bestedigten von vnsirn
mannen vnd vndersessen behuset oder behouet oder jn keynerley furderunge heimlich oder offenbar getan wurde zu derselben leibe vnd gute sullen
wir tun als zu denselb schuldigen ouch sullen wir die vorgen(anten) marggrafen an dem hus Rosemb(er)g vnd allen seinen zugehorungen vnd sie vns die
weyl vns dem hose lutmerstorff der Stat doxall vnd jren zugehorungen die egen(ante) czeit nicht hindirn noch jrren noch vns jren werten jn khei
nerleis noch nymand von vnsir wegen wir sullen ouch die Strassen vff wasser vnd lande geyn lassen vnd dran nymand hindirn noch nymand der
vnsirn gestatten zu hindirn jn kheynerleis vnd wer korn kaufft dem sol man eyn czeichen vmb sust geben vnd den korn somd domit fertigen an arge wer aber
das ymand korn kauffte vnd domit hyndir faren wolde an czeichen wo der betreten wurde den mag man hyndirn vnd vfhalden Aber er schol nicht mer
vlisen noch schaden nemen dann das korn das bey jm betreten wirdet vnd vff das das das egen(ante) gutliche vnd fruntliche steen von vns egen(anten) kunig
Wenczlaff vnuerruckt gehalden werde so haben wir vnser cleiner jnsigel an disen brief gehangen Geben zu prage nach crists geburt vircze
henhundirt jar vnd darnach jn dem Eylfften jare an allerheiligen abent vnsir reiche des Behemischen jn dem newnvnddreissigisten vnd
des Romischen jn dem Sechssvnddreissigisten jaren
Per d(ominum) lagkonem argim(en)t(um) cur(ie)