W(ir) Anthonius van gots genaden hertzoge van loth(ringen) van Brabant vnd van lym(burg) vnd Margreue des heiligen Riches, Vnd
Elizabeth bedu selb(er) genaden hertzogynne vnd Marggraffynne der vurgen(anten) lande, Allen den ghenen die diese genwertige brieue sien
oder horent lesen Salut Also as der aller durchluchtigiste furste vnd h(er)re vns(er) genediger h(er)re der Roemsscher künning vnd künning zo
Behem, vns sijn hertzdomp vnd lant van lutzemb(urg) vnd die graiffschaff van chiny mit allen iren zoigehoirungen beuolhen vnd in pandschafft
zo bewairren vnd zo behalden Ingeben vnd beuolen haet gelich vnd in al der maissen as die brieue die wir van dem seluen vns(er)m gnedigen
h(er)ren (om)b syne maiestat sigel besiegelt In haen das clerlichen vsswisen Do haen wir in genkewirdicheit der edeler manne vns(er) lieuen getruen
vnd gerueden zo wisen ist, Engelbrechts greue zo nassou h(er)re zo der leck vnd zo Breda, h(er)n henrics van bergen h(er)re van grymberge Johans
van Roemroist burchgreue zo monioye, vnd h(er)n Arnolts van Caupenhem h(er)re zo grobbendonc, vnd noch vil ander edeler manne In diesen sachen
geroiffen, Soliche friheit Rachte gewonheit hakomen brieffe karten oder hantfesten groiss vnd cleyne Welcherley die syn moigen, die die stede
Burben vnd Inwoner van Diedenhouen, haent oder hauent moigent vnd in vurziden besessen vnd gehat syn van allen iren h(er)ren
keis(er)n künningen hertzogen vnd graffen des lants van lutzemb(urg) van vurziden herwert bis an vns In alle der maissen vnd wisen as die
seluen brieffe das clerlichen Inhalden vnd vsswisen, haen wir geloefft vnd gelouen vur vns vns(er) erben vnd nakomen mit vns(er)n furstlichen
truwen in craftes die burger stat Burger vnd Inwoner zo Diedenhouen, In alle ire nakomen In alle der obegen(anten) irer friheit Rachten
gewonheit hakomen, brieffen karten oder hantfesten nach lude vnd vsswisunge der seluer brieffe so sy van alters oder van nuwes In geben
vnd luden lantrecht vnd vssennigen der gerichte vnd scheffen des hertzdomps zo lutzemb(urg) Iclichs nach syner gewonheit gentzlichen
fredelichen vnd gerulichen zo behalden, vnd sy da by do laissen vnd ymmer da wider zo doin oder van vns noch nymans anders laissen
getaen werden in eyniger zokomenden tziden ewichlich vil in keyne wise, Allen argelist vssgescheiden, wir Anthoni(us) vnd
Elizabeth hertzoge vnd hertzogynnen vurgen(ant) beder siegele an diesen offenen brief gehangen, Vnd vmb zo merer stetikeit der obegen(anten) friheit
Rachte gewonheit brieffe karten vnd hantfesten sy do by zo behalden So haen wir den obgen(anten) edelen mannen vns(er)n lieuen getruen vnd
gerueden, vmb das sy da bi vnd an geweeft haben da alle furste gescheit syn in alle der maissen vurss(creuen) beuolen, das sy da vmb
ire siegel bi die vnse an diesen offenen brief henken, Vnd wir Engelbrecht greue zo nassou h(er)re zo der leck vnd zo breda, henrich
van bergen h(er)re zo grymbergen Johan van Roemroist burchgreue zo monioye vnd Arnolt van Caupenhem h(er)re zo grobbendonc
vmb das wir da an vnd bi geweeft haben da alle furste in vurss(creuen) stat gescheit syn So haen wir van geheisse vnd beuele vns(er)
genediger h(er)re vnd frauwen des hertzogen vnd hertzogynnen vurss(creuen) vnse siegele biden iren an desen offenen brief zo orkont
der warheit gehenken, Geven vnd getaen Inder stat zo Bastenachen des sonntags nach der heiligen drienien tag Inden Jare vns(er)s
h(er)ren tausent vierhondert vnd Eilffe

Per dnos(tros) Inrom(anos)
et Inassam(os)

p(er) de halle