Wir Wenczlaw von gotes gnaden Romischer kunig zu allen czeiten Merer des Reichs vnd kunig zu Behem Bekennen vnd tun kunt
offenlich mit disem briue allen den die jn sehen oder horen lesen Das vor vnse kunigliche Maiestat des Erwirdigen Wenczlaws Bischoffes zu
Bresslaw vnsers liben oheims vnd fursten machtboten mitnam die Strengen Jnikel von lagaw vnd Seyfrid von Bischoffwerde vnse
liben getrewen komen sint mit desselben Bischofe Wenczlaws ganczer redlicher vnd voller macht vnd gewalt als das sulche gewalt briue
die sie von jm doruber hant Wol vswesant vnd baten vns von desselben Bischofe Wenczlaws Erblande vnd Stete Wegen mitnam lignicz vnd
Golcberge als derselben lande rechten ordenlichen vnd naturlichen Erblehenherren das Wir dem hochgebornen Ludwigen herczogen zum
Brige vnsem liben oheimen vnd fursten alles das das er jm vnd seinen Erben vff den egen seinen landen vnd Steten zu legnicz vnd zum
Golcberge vnd iren zugehorungen gegeben vnd vorschriben hette ader noch in zukunftigen czeiten geben vorschreiben vnd an jn brengen
Wirde zuleihen vnd zubestetigen gnediclich geruchten Des haben Wir angesehen des egen Wenczlaws Bischofs zu Bresslaw fleissige
bete vnd ouch dinste vnd trewe die er vnd ouch der egen ludwig vns in vnser erhaftigen vnd merklichen sachen etwe dicke getan haben
vnd furbasmer in zukunftigen czeiten tun vnd leisten sullen vnd mugen vnd haben dorumb mit Wolbedachtem mute gutem rate vnser
fursten herren Edeln vnd getrewen alle vnd ygliche gaben die der egen Bischoff Wenczlaw dem Vorgen ludwige vnd seinen Erben
vff den egen seinen Erblanden vnd Steten zu lignicz vnd zum Golcberge vnd iren zugehorungen gegeben hat vnd vorschriben oder
dorvff in zukunftigen czeiten geben oder vorschriben wirdet Welcherley das We gnediclich gelihen vnd bestetiget leyhen vnd bestetigen
jn die mit craft dis briues vnd kuniglicher macht zu Behem als derselben lande vnd Stete rechter ordenlicher vnd naturlicher
Erblehenherre also das sie der egen gabe die jn der egen Wenczlaw Bischoff zu Bresslaw vff den egen seinen Erblanden zu legnicz
vnd zum Golcberge vnd iren zugehorungen als vorgeschriben steet gegeben vnd vorschriben hate oder dor vff in zukunftigen czeiten
geben vnd vorschreiben Wirdet geniessen vnd gebrauchen sullen vnd mugen in aller der masse rechten vnd Wesen als die der egen
Wenczlaw Bischoff zu Bresslaw vnser liber oheim vnd furste von Vns vnd der Cron zu Behem jnnegehabt Besessen vnd der
bis her genossen vnd gebraucht hat vnd sollen ouch dobei gerublichen vnd vngehindert bliben vor allermeniclich Wann Wir sie
dobei vor allen andern gnediclichen behalden Wollen Vnschedlich doch vns an vnser lehen dinsten vnd rechten Mit vrkunt dicz
briues Vorsigelt mit vnser kuniglichen Maiestat jnsigel Geben zu prage Nach Cristes geburt Virczehenhundert jar vnd dornach
in dem dreyczehenden jare des nechsten dinstags vor sand Vrbans tage vnser Reiche des Behemischen in dem funfczigsten
vnd des Romischen in dem Sybenvnddreyffigsten jaren
Per d(ominum) Conrad(um) Ep(iscopu)m olom(ucensem)
Johannes de bamb(er)g