Wir Friderich Wilhelm vnde Friderich von gots gnaden lantgrauen In doringen vnde marggrauen zcu missen Bekennen vnde tun kunt uffinchlich mit diesim briefe allen den die yn sehin adir
horin lesin daz wir von solchir czwitracht wegin stosse vnde bruche die czwuschin dem Allirdurchluchtigisten fursten vnde heren hern Wenczlawen Romyschen konige zcu allen zciten merer des
riches vnde konige zcu Behemen an eynem teile vnde vns an dem andern sind vor vns vnde vor alle vnse furstenthum lande stete vnde slosse merckte dorffer wo die gelegen sind wy dy genant
sind vndirsessin Inwoner helffer vnde diner vnde besundir alle die durch vnser willen tun vnde lasen wollen In welchim wesen adele adir wesen die sind geystlichin adir werntlichin nymandes
vzgenomen mit dem genanten allirdurchluchtigisten fursten konige Wenczlawen vnde alle sinen furstenthum landen steten vnde slossen merckten vnde dorffern wo die gelegen sind geystlich adir
werntlich nymandes vzgenomen eyn gutlich vnde fruntlich sechin uffgenomen haben vnde nemen daz uff macht diesis briefis vnde in craft wiese daz selbe gutliche vnde fruntliche sechin
czwuschin vns beider beidensiten weren sal von datum diesis briues uffe den nehsten sente michahelis tag vnde den tag gancz vz vnde globen ouch dem Allirdurchluchtigisten fursten konige
Wenczlawen vnde mit yn den Edeln vnde gestrengen Ern Albrechte von Coldicz hern zcu Belin hern Ancze hasin vnde hern henricze Crapfen mit wolbedachtem mute mit gutem vorrate vnde rechter
wissen in crafft diesis briues by vnser furstlichin worten vor vns vnde vor alle vnse furstenthum lande vnde vndirsessin Inwoner helffer vnde dinere daz egenante fruntliche vnde gutliche sechin
dem egnt(en) konige Wenczlawen die czit gancz vz vnde vz stete vnde gancz vnvorrucket zcu halden vnde zcuuolfuren ane allis geuerde vnde argelist vnde weres sache daz der obingenante vnser herre
der konig vnde syne mann vnde vndirsessin in dem egenanten gutlichin vnde fruntlichin sechin von vnser mann vnde vndirsessin angegriffen vnde beschediget worden dar an sullen wir mit macht tun das
solliche name genzlichin vnde gar widder gekert werde bynnen virczentagen noch der vormanunge vnde weren die selben in vnser landen beslosset vnde besessin vor die selbin sullin wir zcihen vnde sie dar
zcu brengen daz sy die egenanten name dem obgenanten vnsern hern dem konige vnde den Edeln vnde Gestrengen als sie vorgeschrebin steyn vnde den die beschediget worden genzlichin vnde gar
widderkeren dar zcu er vns ouch ab das not sin worde mit siner macht getruwelichin behulffin sin sal als balde als er von vns vormanet wirdet Were ouch sache daz die die des egnt(en) vnser heren des
koniges lande vnde lute vnde vndirsessin an griffen vnde beschedigeten in vnser landen nicht beslosset noch besessin sundir roubere weren so sulen wir bestellin mit vnsern Amptluten vnde steten daz
man die selben wo man die in vnser landen an kumt mit iren liben vnde gutern uffgehalden werden vnde die selben in vnser landen nymand husen noch vordedinge tun heymelichin noch offinbare
indeselbin den selben roubern vnde beschedigern ouch der vorgenante vnse hre der konig siand sin sal glicheirwis als wir selbis vnde sal sie ouch in sinen landen nicht husen noch herbergen sundern
mit sinen Amptluten an walden steten schaffen vnde bestellin daz sie die selbin roubere in sinen landen mit irem libe vnde gute uffgehalden bekumert vnde gestrafft werden wo man sie ankumt
als sollicher schedelicher lute recht ist Ouch weres sache daz die die des egnt(en) vnser hern des koniges lande vnde lute vnde vndirsessin an griffen vnde beschedigeten von vnser mann vnde vndirsessin
behusit adir behoset adir Ihemorleie hindernisse heymelichin adir offinbar getan worde zcu der selben libe vnde gute sullen wir griffen vnde tun als zcu den selbschuldigin Ouch sullin wir vnsern
herren dem konige an dem hofe lutemarsdorff der stat doxow vnde iren zcugehorungen vnde er vns die sinen vns an Eysenburg vnde an allin sinen zcugehorungen die egnt(en) zcit nicht hindern
noch irren noch vns darin werin in dheinwis noch nymandes von vnser wegin wir sullin ouch die strassen uff wasser vnde uff lande gehin lassin als die vonalders gegangen hat vnde daran
nymandes hindern noch nymande gestaten darindin zcu hindern vnde wer korn koufft dem sal man eyn gleyte gebin vmb suse in der stat da er daz koufft vnde den damite vonsin dan fertigen
ane arg vnde ane geuerde wer abir daz ymand korn kouffte vnde is in vz furen wolde ane zceichin wo der betreten worde den mag man hindern vnde uffhalden Abir er sal nicht mer vorlusen noch
schaden nemen dann das korn daz betreten wirdet vnde uff das das egnante fruntliche vnde gutliche sechin von vns egnt(en) lantgrauen In doringen vnde marggrauen zcu missen vnvorruckt
gehalden werde des zcu urkunde habin wir vnse Ingesigele an diesen briff hiemander wissintlichin lassin hengen der gegebin ist noch crists geburte druzcnhundirt Iar dar nach in dem
driczenden Iare Am frutage vor der heiligen dryualdikeit tage