Wir Johans von gotes gnaden Burggrafe zu Nurenberg Bekennen fur vns vnser Erben vnd alle vnser nachkomen Burggrafen zu Nurenberg vnd tun kunt offenlich mit
disem briue allen den die jn sehen oder horen lesen Wann der Allerdurchleuchtigste furste vnd herre her Wenczlaw Romischer kunig zu allen czeiten merer des Reichs vnd kunig zu Beheim vnser
liber gnediger herre sich mit vns vmb alle vnd ygliche geltschulde diewir an jn gefordert vnd jn vns die zubezalen offte vnd dicke gemanet haben gutlich vnd fruntlich vereynet hat Also das
er vns fur dieselben geltschulde vierundzweinczig Tausent Remische gulden vff den nachgeschriben seinen Slossen Steten erachten dorffern vnd gutern mitnamen vff dem slosse Beheimstein
mit dem stetlein pegnicz vnd der stat hoselicht vff dem slosse frankenberg vnd den dorffern plech vnd loutenhart vff Erlangen haws vnd stat vff der stat prussenstat vnd dem slosse do
selbst vff der vesten aurbelstat vnd dem dorffe daselbst Benamet bescheiden vermarket vnd verschriben hat als das sein kunigliche maiestatbriue die vns sein gnade doruber geben hat wol
vswaisen vnd dorumb mit wolbedachtem mute gutem vorrate vnd rechter wissen vnsers edeln vnd getrewen So sagen wir den egen(anten) vnsern gnedigen herrn kunig Wenczlaw alle sein erben
vnd nachkomen vnd alle jre vorfarn kunige vnd die Cron zu Beheim aller vnd yglicher geltschulde diewir an den egen(anten) vnsern gnedigen herrn dem kunig gefordert vnd jn dorumb gemanet
haben fur vns alle vnser Erben vnd nachkomen Burggrafen zu Nurenberg mit craft dis briues genzlich vnd gar frey queit ledig vnd loze vnd globen jn ouch bey vnsern furstenlichen
worten vnd trewen in craft dis briues das wir sie nu vnd furbasmer ewicklich dorumb nicht anlangen ansprechen noch manen sollen noch wollen in dheineweis an alles geuerde
vnd argelist Wir sollen vnd wollen ouch dem egen(anten) vnsern gnedigen herrn kunig Wenczlaw alle vnd ygliche briue vnd hantfesten die wir von jm oder seinen vorfarn kunigen zu Beheim
ober die egen(anten) geltschulde haben wider zugeben vnd zuantwurten mitnamen vber das sloss Rotemburg vnd vber wochangalt vnd ouch sust alle and(er) briue forderunge heyschunge vnd anspruch
in welicher weise die weren die wir zu jn oder der Cron zu Beheim von der egen(anten) geltschulde wegen haben genzlich vnd gar abczutun vnd der furbas nicht zugebrauchen noch zugeniessen an
dheinen steten als sie ymer zuliabte qwemen oder furbraht wurden an alles geuerde vnd argelist Jteme vmb der egen(anten) vnser gnediger herr kunig Wenczlaw sein Erben vnd nachkomen kunige
zu Beheim vns vnsern Erben vnd nachkomen Burggrafen zu Nurenberg die egen(anten) vierundzweinczig Tausent Remische gulden gut an golde vnd an gewichte mitsampt der summe geltes
die wir vormals vff den egen(anten) slossen haben geben richten vnd bezalen nach vswaisunge vnd jnhalt vnser briue die wir von seinen gnaden doruber haben So sollen vnd wollen wir jm der
egen(anten) Jrer slosse stete erchte dorffe vnd gute mit jren zugehorungen als wir die yczunt jnnehaben vnd besiczen lediglichen wider abtreten vnd jn die an alle widerrede widersprechen vnd
seumnisse wider einantwurten in jre hende vnd jn ouch doruff kein ander gelt zustahn noch schaden rechen in dheineweis Auch so wollen vnd sollen wir die egen(anten) slosse stete erchte dorffe
vnd gute alle die weile wir vnser Erben vnd nachkomen Burggrafen zu Nurenberg die jnnehaben vnd besiczen dem egen(anten) vnsern gnedigen herrn kunig Wenczlawen seinen Erben vnd nachkom(en)
kunigen vnd der Cron zu Beheim vnd jren Amptlewten an jrer stat offen also das sie sich mit jrem folke vnd lewten dorus vnd dorein wider allermeniglich nimands vsgenomen behelffen
sollen vnd mugen als offte jrs des note sein wirdet vnd wir des von jn ermanet werden an alles geuerde vnd argelist doch vff jre koste vnd an vnsern schaden Vnd ab der egen(ante) vnser gnediger
herr kunig Wenczlaw vormals ichtes vff denselben seinen slossen vnd steten oder jren zugehorungen jemande verschriben hette noch verschriben oder briue geben wurde vnd ab er ouch mit
jemande eynunge oder puntnisse gemacht hette machen wurde oder gewunne in welichen enden oder wesen die weren nymands vsgenomen das sol alles vns vnd vnsern Erben oder wer dysen
briue mit vnsern guten willen jnnehette der anders werntlich vnser genosse were vnd des egen(anten) vnsern gnedigen herrn kunig wenczlawes vnd der Cron zu Beheim feint nicht ist keynerley scha
den fugen noch brengen an der egen(anten) vnsern gnedigen herrn kunig Wenczlawes verschreibunge die er vns getan hat vff den obgenan(ten) seinen steten vnd slossen vnd jren zugehorungen an geuerde
Vnd wir mugen ouch sulche sein stete vnd slosse mit jren zugehorungen furbas wol versetzen oder geben weme wir wollen die weile sie der egen(ante) vnser gnediger herre kunig Wenczlaw sein
Erben vnd nachkomen kunige zu Beheim die nicht gelost haben mit sulcher sumen gulden oder geltes als oben geschriben stet Vnd weme wir dieselben slosse vnd stete also seczen oder geben
wurden bey gesuntem vnserm leibe oder an vnserm todbette der doch werntlich vnser genosse sein sol vnd des egen(anten) vnsern gnedigen herrn kunig Wenczlawes vnd der Cron zu Beheim feint nicht ist
der oder dieselben sullen sulche slosse mit jren zugehorungen in aller masse vnd rechten jnhalten als wir selber von dem egen(anten) vnsern gnedigen herrn kunig Wenczlaw seinen Erben vnd nachkomen
kunigen zu Beheim vngehindert Vnd dieselben sollen sich ouch gen demselben vnsern gnedigen herrn kunig Wenczlaw sein Erben vnd nachkomen kunigen vnd der Cron zu Beheim mit jren slossen
briuen in aller masse verschreiben als wir vns gen jm verschriben haben an geuerde Vnd wir sullen jn ouch antwurtzen dieselben seyner briue seczen vnd geben von demselben den wir die egen(anten)
slosse stete vnd gute mit jren zugehorungen seczen oder geben werden ee wir jn die eingeben oder der abgetreten haben Geschehe ouch das der egen(ante) vnser gnediger herr kunig Wenczlaw
sein Erben oder nachkomen kunige zu Beheim die obgenan(ten) slosse vnd stete mit jren zugehorungen lozen wolden vmb ein sulche sume gulden oder geltes die vns vnd vnsern Erben der
egen(ante) vnser gnediger herr kunig Wenczlaw vor vnd ouch yczunt von newes doruff verschriben hat So sollen sie nicht ein slosse oder zway alleyne oder mere sunder alle obgeschriben slosse
vnd gute miteinader lozen vnd von vns brengen vmb ein sulche sumen gulden oder geltes die wir vor doruff nach jrer briue lawte haben vnd den vierundzweinczig Tausent Remischen
gulden die vns der egen(ante) vnser gnediger herr kunig wenczlaw doruff yczunt von newes verschriben hat als das alles in seinen kuniglichen maiestatbriuen eygentlich geschriben stet vnd
wir obgen(anter) Burggraff Johans globen dem egen(anten) vnsern gnedigen herrn kunig Wenczlaw sein Erben vnd nachkomen kunigen zu Beheim bey vnsern furstenlichen worten vnd trewen fur vns vnser Erben
vnd nachkomen Burggrafen zu Nurenberg vnd nemlichen die die des egen(anten) vnsern gnedigen herrn kunig Wenczlawes briue die er vns vff die egen(anten) slosse vnd stete gegeben hat mit vnsern
guten willen jnnehetten oder den wir die egen(anten) slosse versaczten oder gegeben hetten in craft dis briues alle vnd ygliche stucke Artikel meynunge vnd begriffe als die in des egen(anten) vnsern gnedigen
herrn kunig Wenczlawes vnd ouch in disem vnsern yegenwurtigen briue von worte vnd zu worte geschriben sten stete gancz vnd vnuerruckt zuhalden vnd zuuolfuren vnd derab nicht zugeen
in dheineweis an alles geuerde vnd argelist Vnd des zu vrkunt vnd warer sicherheit haben wir obgen(anter) Burggraff Johans vnser jnsigel mit vnsern guten wissen vnd willen an dysen briue lassen
hengen der geben ist zu prage nach Crists geburt Driczehenhundert Jare vnd dornach in dem sechczehenden Jare des nechsten Sontages vor dem heiligen Pfingsttage