Wir lewpalt vnd Cvnrat vnd Jan gebruder von Krayg Bechen vnd tuen chund offenlich mit
dem brief allen die die den brief sehen oder horen lesen, das wir von dem Allerdurchleuch
tigisten fursten vnd h(er)ren h(er)r wenczlabn Romisch(e)n kunig zu allen czeiten merer des Reichs vnd
kunig zu Behem vns(er)m liebn gnedigen h(er)r(e)n vnd von allen seine(n) vorfordern kayne brief haben
die d(er) auf gelosgult lawtet, die sie vns schuldig wern, vnd sprechen auch das wir vnser zwen teilln
an chraft dicz briefes an alles geu(er)d vnd argenlist awssgenomen nemlich den brief den ich
abgenant(er) lewpalt von krayg von dem egnanten meim gnedig(e)n h(er)ren kunig wenczlabn hab auf
die stat Znaim vmb Tawsent schok gro(ss) der in seine(n) chreften beleibn sol. vnd domit wer
es sache das von vns abgenant(e)n brudern von krayg in chvnftigen czeiten dhein brief furbracht wurdn
oder zu liechte quemen die wir von dem egnant(e)n vns(er)m gnedig(e)n h(er)ren kunig wenczlabn vnd allen
seine(n) vorford(er)n vmb gelosgult hetten, die selbn brief sulln furbasmer ewichlich kein macht noch chraft
habn sunder genczlich vnd gar tot sein, vnd wir sulln vns(er) willn derselbn nicht geniessen noch gebrauchen
in dheine weis, Auch ist gelobt ich abgenant(er) lewpalt von krayg dem egn(anten) meim gnedig(e)n h(er)ren kunig
wenczlabn von datu(m) dicz briefs funf gancze Jar nach eynander zugeilen zu dienen an alles geu(er)d vnd
vnd argenlist vmb die Tawsent schok gro(ss) die ich in den egn(anten) funf Jaren von den Burg(er)n der stat
Znaim vmb sein von seine(n) wegen aufheben vnd einnemen sol also das in dem brief den er mir
darub(er) gebn hat aigenlich ist begriffen vnd des zu warchunt habn wir abgenant(e)n lewpalt
Cvnrat vnd Jan gebruder von krayg vnser ir(e)r sigel mit recht(e)n wissen an dysen brief lassen
hang(e)n der gebn ist nach Cristi geburd virzehenhund(er)t Jar vnd darnach in dem sechezehenten
Jar an suntag vor vnser frawen tag der liechtmesse