Ich heinrich herre czu plawen Bekenne offinlich mit disem briffe allen den die jn sehen adir horen lesin daz ich mit dem allirdurchleuchtigisten fursten vnd
herrn hern wenczlaw Romyschen kunig czu allen czeiten mer des Reichs vnd kunig czu Behem meyme gnedigen hern gutlich voreynet vnd vorsunet
bin also daz syne gnade mir vnd myne erben vor alle sachen die etwen myn liber herre vnd vater her heinrich von plawen vnd auch ich an synen
gnaden vme geltschulde vorschreibunge schaden koste vnd czerunge die wir jn synem vnd syner vorfarn dinste enpfangen haben vnd getragen czu
sprechen gehabt han achtczenhundirt schog grossen prager muncze gebin vnd beczalen sal vnd doruff so globe ich dem egenanten meyme gnedigen hern
kunig wenczlaw mit gutem vorrate vnd rechter wissen in craft dis briffes bey meyne trewen vnd eren alle vnd igliche hantfesten vnd briffe
die etwen der egenante her heinrich mein vater vnd auch ich von dem egenanten myne gnedigen hern kunig wenczlaw vnd allen synen vor
farn kunigen czu Behem vber geltschulde vorschreibunge koste czerunge vnd schaden als obgeschrebin stehet bis uff dise czeit gehabt haben gencz
lich vnd gar widirczugebin vnd in sein hende czu antwurten der ich ouch syne gnaden iczunt eyns teils geantwurt habe mit namen eyne brieff dor
jnne er mir uff seyn stat cziun Cadan gnade jtem den andir dorjnne er mir uff seyne steten czu Egra vnd cziun Cadan dreyhundirt schog
grossen vorschrebin hat jtem den driten den er mir uff achthundirt vnd achczig schog grossen prager muncze uff geltschulde gegebin hat
vssgenomen doch sulche briffe die ich von des egenanten meynes gnedigen hern kunig wenczlaw gnaden vbir die dorffe Tynstema vnd Chody genant
czum heilgen Czeicz vnd sust vber mein erbe lehenschaft gnaden vnd freyheit habe vnd dovon wold sich daz deheinerley briffe czu lichte quemen
vnd jnner furbracht wurden die vor dato dis briffes gegebin weren do mete der egenante meyn gnedig herre kunig wenczlaw syne erben vnd
nachkomen kunige vnd die Cron czu Behem von des egenanten meynes vaters myner erben vnd nachkomen von plawen wegen vme gelt
schulde vorschreibunge koste czerunge adir schaden die wir jn seyne vnd seyner vorfarn kunige czu Behem dinste genomen hetten gemanet
wurden die selben briffe sullen furbas mer kein craft noch macht habn Sunder an allen steten vnd gerichten genczlich vnd gar vntuglich
sein vnd ich meine erben vnd nachkomen von plawen sullen vnd wollen ouch den egenaten meyn gnedigen hern kunig wenczlaw seyn erben
vnd alle syne nachkomen kunige vnd die Cron czu Behem von sulcher sachen wegen als obengenant stet furbas czu ewigen czeiten nicht
manen noch an langen mit worten noch mit werken in dheineweis an allis geuide vnd argelist wande wir sic all obignaten sachen mit gutem
vorrate vnd rechter wissen in craft dis briffes genczlich vnd gar frey queit ledig vnd los sage vnd lasse vnd des czu vrkunt vnd
warer sicherheit habe ich obgenant heinrich herre czu plawen fur mich meine erben vnd alle myne nachkomen von plawen meyn jnsigel
vnd auch die edeln hern her heinrich von elsterberg vnd her Bustald von Swamberg meyn guten frunde durch meyn fleissig bete willen
jre jnsigil czu geczeugniss aller obgeschrebin sachen czu dem meynen an disen briff lasen hengen mit vnsir aller gutem willen vnd wissen
der geben ist nach cristi geburt virczenhundirt jar dornach jn dem sibenczenden jare am Sontage letare den man nennet mitfasten