Anthonis von gots gnaden, hertzog zu loth(e)r zu Brabant und zu limburg
marggraue des haligen Richs und Elizabeth hertzogynne derselben hertzog=
tumb und marggraffynne der marggraffschafft vorgenant. Tůn
kunt allen lewten und erkennen mit disem offen brieff, als das der
Allerdurchleuchtigst hochgeborn furst unser lieber gnedig(er) Herre der
Romisch und Behmisch kunig uns sin Hertzogthumb von lutzemburg
und Graffschafft von chiny ungeben und verschriben hatt als die
brieue das furbass clerlichen ynnhaldent, in welichen briefen er
schreibet und gebewt allen prelatn Grauen freyen herren, Rittern
knechten Steten und allen andern undersassen desselben Hertzogtumbs
und Graffschafft das Sÿ uns und unsern erben eyd und huldung
tun nach ynnhalt derselben brieue, So haben uns die Erbarn unser
lieben getruwen Richter Scheffen und gemeinden der Statt zu
Diedenhofen eyd und glubd getan getrew und holt zu sin nach
ynnhalt d(er) vorgenanten brieff, weliche eyd und glubd wir auch
also von jn auffgenomen haben, und ensullen noch enmugen wir
noch unser erben Sÿ nachmals nit forter anlangen das Sÿ uns
eÿniche ander eÿde noch gelubde getan habn in keyne weise den
nach ynnhalt der vorgenanten brieff. und des zu urkunt habn
wir unser jnsigel an disen brieff tůn hengen. Geben zu
Lutzemburg xxvj tag im Apprille jm jar unsers Herren
Tusent vierhundert und zwolffe