Wir Ratman(n) der Stat zu Breslo(w) Bekenn(en) vnd tun kund offenelich(e)n mit desem kegenwertigen briefe Allen die jn sehin ader horen lesen Das der Allerdurchluchtigst(e)
furste vnd herr her Sigm(un)d von got(e)s gnad(e)n Romischer kunig zu allenczeit merer des Reichs vnd zu hung(er)n zu Behem(en) dalmac(ien) vnd Croac(ien) (etc) kunig vnser gnedigst(er)
herr begeret hat jm eyn recht zufinden mit vns(er)n Eltist(e)n Rotslewte(n) Schepp(e)n vnd gesworne vnd dorzu mit den Ratman(n) aller nochgeschrebin stete die seyne gnade vmb
sulcher sach(e)n willen vf dese czeit her zu vns besant hat Nemelich(e)n Swidnicz Stregon(n) Jawor lembe(r)g Bunalow Reichenbach hussb(er)g Namslow vnd Newmarkt Oulcz
recht twr ouch vf den tag besalt hab(e)n Des hat seyne kunigliche gnade seyne weyzen Rete dorzu gesand Nemelich die Edlen hern heinrich von der Lype marschalk hern
Albrecht von Coldicz obirsten Cammermeyst(er) der Crone zu Behem(en) vnd hinrich von Lazan howptm(an) zu Breslow vnd hinricz(us) von Lobkowicz obirsten schriber der lanttowffel
zu Behem(en) vnd Johannsen von Costalicz jm Swarczenwalde heinczen von lazan howptm(an) zur Swidnicz vnd Boczken Czetthras vnderhowptm(an) zu Breslow vnd hannsen wildperg
Die gestand(e)n hab(e)n vor geheget(er) bank vnd hab(e)n claget von vns(er)s gnedig(e)n h(er)rn des kunig(e)s weg(e)n Czum erst(e)n obir vorreter die den Rot obirtret(e)n hab(e)n das gewald vnd freuil
gescheh(e)n ist an seyne herlichk(ei)t die seyn(e)n gnad(e)n vnd seynes Rates gesworne gewest sind Czum andermale das von sulcher obirtretunge jre helffer vnd nochfulger jn seyn
Rothuss jngelowffen sein mit gewoppender hand vnd seyne Rattherrn mit gewald vnd freuil vffgehawen hab(e)n Czum drittemole das sie seyne kunigliche(n) Casten jm
Thorme hab(e)n vffgehowen seyne furstliche briefe zuryssen zuhawen zustoch(e)n vnd wegtgetrag(e)n Czum firdenmole das sie von deme Thorme mit gewald vnd freuil seyne
Ratman(n) vnd Schepp(e)n eynteyls gemordet vnd erale derworffen hab(e)n vnd eyn teyls hab(e)n lossen richt(e)n ane schuld vnd ane recht Czum funftemmole das sie mit gewald
vnd freuil etliche gemach vff deme Rothusse vffgehowen hab(e)n vnd die Salmarie vnd Casten vffgebroch(e)n vnd seyne(n) gnad(e)n kewblich geld doraus genome(n) hab(e)n vnd sich
von eygener gewald an seyne kunigliche Stat gesaczt hab(e)n doran seyne Ratman(n) gesessen hab(e)n Czum Sechstenmole das sie seyne(n) gnad(e)n gewaldiclich(e)n vnd mit freuil
gerowbt hab(e)n Also das sie seyne harnasch vnd wopen kewblich von deme Rothusse getrag(e)n hab(e)n den vor czeit(e)n vns(er) gnedig(er) h(er)r her karll der keyser seyn(e)s gnad(e)n vater
seliges gedechtniss mit seyne(m) eygene(m) gelde gege(n)wart hat vnd jn demselb(e)n harnasch vnd mit demselb(e)n wopen eynteyls der gewald vnd morde volbracht vnd getane hab(e)n Czu
Sebend(e)n mole das sie vnsers gnedig(e)n h(er)rn des kunig(e)s festen vnd gefengnisse gewaldiclich(e)n mit freuil vffgebroch(e)n vffgeslagen vnd doraus lewte frey gelassen hab(e)n die des land(e)s
vnd der Stat grosse beschediger gewest sein vnd ouch lewte die dem kowffmane gros schuldig gewesen sein vnd vmb derselb(e)n schulde willin dorynne gesessen hab(e)n Vnd die
obgen(anten) vnsers gnedig(e)n h(er)rn des kunig(e)s Rete hab(e)n vf die vorgeschrieb(e)n stucke vnd clagen begert ey(n) Recht zufinden vnd awsszusprech(e)n als was sie dorum(m)e besund(e)rn vnd
vorfallen sein Vnd wiewol obir alle vorgeschrieb(e)n sach(e)n vns(er) gnedig(er) h(er)r der kunig eyn sulch recht von seyn(er) herlichk(ei)t selb(e)n hat zunolffuren zubozen vnd znnedern
noch seynen kuniglich(e)n gnad(e)n vnd will(e)n doch wenn seyne gnade das y(cz) von vns begert So hab(e)n wir vorgen(anten) Ratman(n) zu Breslow mit vns(er)n Schepp(e)n Eltist(e)n
kowfflewte(n) vnd gesworne vnd mit rate aller obgen(anten) Stete noch vns(er)n eyden die wir vns(er)m jngeheget(e)n bank gesessen hab(e)n eyn sulch recht funden vnd awssgesproch(e)n vor Recht
Also das alle die die sulch(e)n Rot obirtret(e)n vnd die tat getan hab(e)n wellerley die sint mit Rate vnd mit hulfe das die vorfallen sein vns(er)m gnedig(e)n herrn deme kunige
leybes vnd gutes vnd ander nochfulger die domete gewillet vnd gewillekort hab(e)n die mag seyne gnade Straffen noch seyn(e)n gnad(e)n vnd noch seynem kuniglich(e)n willen
von Recht(e)s weg(e)n jtem dornoch frogeten abir vnsers gnedig(e)n des kunig(e)s Rete als obngeschrieb(e)n stehet wer die die von sulcher clage abetrunnig(e)n wurd(e)n sein vnd jn die
Ochte kome(n) sein vnd sich nicht vorantw(ort) hab(e)n anfallen sein Dorvf so sprech(e)n wir obgeschrieb(e)n vor ey(n) Recht das sich vns(er) gnedig(er) herr der kunig zu jrem gute hald(e)n mag
vnd zu jrem leybe schick(e)n wo er sie gehab(e)n mag von Recht(e)s weg(e)n Vnd des zuczeugnisse hab(e)n wir vorgenan(n)t(e)n Ratman(n) zu Breslow der Stat Breslow jnsigel an
dess(e)n brief lossen hangen Geb(e)n jm montage noch deme Sontage als man jn der kirchen gotis singet Esto michi in dem(m) jare noch cristi gebort firczenhund(er)t jar vnd dornoch
jn deme czwenczigst(e)n jare