Wir Sygmund von gotes gnaden Romischer kung zu allen czyten merer des Richs vnd zu Hungern zu Behem Dalmacien Croacien (et)c(etera) kung Bekennen vnd
tun kunt offenbar mit disem brief Allen den die In sehen oder horen lesen Wann Janko malerziel Burggraf zum Elnbogen vnser lieber getruer das
Sloss hertemberg mit sinen dorffern vnd zugehorungen fur Sechs hundert Schok grossen prager myntze in pfandsweise Innehat als das vnsers Bruders
kung Wentzlaws maiestat briefe die er doruber hat wol vswisen vnd dann vns nu derselb Janko zu vnsr notdurft vnd beheglikeit ytzund drühundert
Schok grossen prager myntze an bereytem gelde gelihen hat die wir ouch von Im genomen vnd empfangen haben Dauon mit wolbedachtem mute gutem
rate vnd rechter wissen so haben wir demselben Janken dieselben drühundert Schok grossen die er vns ytzund gelihen hat zu den ersten Sechs hundert Schok
grossen geslagen Also das er vnd sine erben das egen(ant) Sloss hertemberg mit den dorffern vnd gutern Bossengrün Altenfatel Lybnaw loch Altemberg
lawterbach werd horn vnd allen andern sinen zugehorungen woran die sin nichts vsgenomen als die der egen(ant) Janko ytzund Innehat haben hal=
den besiczen der geniessen vnd gebruchen sollen vnd mogen von Allermenniglich vngehindert vnd wann wir vnsere erben vnd nachkomen kunge zu
Behem das egen(ant) Sloss hertemberg mit sinen zugehorungen wider haben vnd losen wollen so sollen wir demselben Janken vnd sinen erben oder dem
der disen brief mit Irem guten willen Innehaben wirdet newnhundert Schok grossen prager myntze zuuoran gentzlich richten vnd bezalen vnd
so wir das getan haben so sollen Sy vns des egen(ant) Slosses mit den vorgen(anten) Iren gutern dorffern vnd zugehorungen lediclichen wider abtreten vnd
vns das Inantwurten vnd sollen vns ouch kein ander gelt doruf slahen noch schaden rechen in kein wis doch so sol das egen(ant) Sloss hertemberg
alle die weile es der vorgen(ant) Janko vnd sine erben Innehaben werden vns offen sein Also das wir vnsere erben vnd nachkomen kunge zu Behem vnd
vnsere Amptlute von vnsern wegen vns doruf vnd dorin wider allermenniglich beholfen vnd geweren mogen als ofte des not geschicht doch an
Iren schaden mit vrkund diss briefs besigelt mit vnsr kunglichen maiestat Insigel Geben zu kunigssale Im closter by prage Nach Crists geburt
viertzehenhundert Jare vnd dornach In dem czweintzigisten Jare des nehsten montags nach sant Vits tag Vnsere Riche des hungrischen (et)c(etera)
In dem vierunddrissigisten vnd des Romischen In dem czehenden Jaren