Wir Sigmund von gotes gnaden Romischer kung zu allen zyten merer des Richs vnd zu Hungern zu Behem Dalmacien Croacien (etc.)
kung. Bekennen vnd tun kunt offenbar mit disem brief allen den die In sehen oder horen lesen. Das fur vns komen ist der Edel Albrecht
von Coldic vnser obrister Camermeister stat vnd lieber getruer vnd hat vns mit diemuetigem flisse das wir Im alle vnd ygliche sine
brieue die sin vatter vnd Er von vnserm anherren kung Johans vnd vnserm vatter keyser karl seligen vnd ouch vnserm Bruder
guter gedechtnusse kung Wenczlaw uber etliche pfantschaft han als zu Budyssin Sechczig schok zum Luban vierczig schok grossen vnd in
den clostern zu Ossek hundert schok vnd zu postelport hundert vnd achczig schok grossen zinses vnd ouch andere priuilegia hantuesten gnade
vnd friheite die sine vordern vnd Er von vnsern vordern erworben vnd herbracht haben zubestetigen gnediglich geruchten. Des haben wir an=
gesehen des vorgen(anten) Albrechts diemuetige bete vnd ouch betracht redliche vnd nucze dienste die Er vns getan hat teglichen tut vnd furbasz tun sol
vnd mag in kunftigen zyten. Vnd haben dorumb mit wolbedachtem mute gutem rate vnser fursten Edeln vnd getruen rechter wissen vnd
von kunglicher macht zu Behem dem vorgen(anten) Albrechten alle brieue die sin vatter von vnserm anherren kung Johans vnd vnserm vatter
keyser karl seligen vnd ouch von vnserm Bruder kung Wenczlaw guter gedechtnusse vf die obgen(anten) pfantschaft erworben haben vnd alle gnade
friheite priuilegia vnd hantuesten die sine vordern vnd er von vnsern vordern kungen zu Behem behalden vnd herbracht haben gnediglich
bestetigt vnd confirmirt bestetigen vnd confirmieren Im die von Behemischer kunglicher macht in craft disz briefs in aller der masze als ob
Sy von worte zu worte in disem brief geschriben vnd begriffen weren vnd meynen seczen vnd wollen das der vorgen(ante) Albrecht furbasz by so
lichen brieuen gnaden friheiten priuilegien vnd hantuesten beliben vnd der ouch an allen enden vnd zu sinen gescheften mechticlichen gebruchen
vnd genieszen in allermasze als die brieue die er hat volkomenlicher lauten vnd vswisen von allermenglich vngehindert. Mit vrkund disz
briefs versigelt mit vnser kunglichen Maiestat Insigel. Geben vf dem Berge zum chutten Nach Cristi geburt vierczehenhundert Jare vnd
dornach In dem czweinczigisten Jare an vnser lieben frawen abend Assumpcionis Vnser Riche des Hungerischen (etc.) In dem vierunddrissigis=
ten des Romischen In dem Zehenden vnd des Behemischin In dem Ersten Jaren.