Wir Albrecht von gotes gnaden Herczog ze Osterreich ze Steyr ze Kernden vnd ze Krain Graue ze Tyrol (etc) bekennen
vnd tůn kund offenleich mit dem brieue Wan wir aigenleich betracht vnd bedacht haben die sunder gnad lieb vnd gunst
die vns der Allerdurchleuchtigist furst vns(er) lieber genedig(er) herre Sweher vnd vater her Sigmund Romischer kunig zu
allen zeiten merer des Reichs zu Vng(er)n vnd zu Behem (etc) kunige manigueltikleich hat erzaiget Vnd nemleich daz er
vns die durchleuchtigen furstin Junkhfrawen Elizabeten sein tochter zu ainer eleichen kauen vnd Gemaheln geben hat
dadurch wir in sunder dankhperkait pilleich genaigt sullen sein vns seins willen vnd wolgeuallen zehalten vnd
zefleissen in wem wir künnen oder mügen Vnd haben darumb vns des gen seinen gnaden verphlichtet vnd v(er)bund(e)n
wissentleich mit kraft ditzs brieues fur vns vnd vns(er) erben ob geschech daz Er eeleich erben gewünne so sullen vnd
wellen wir den selben sein erben getrewleich vnd brüderleich nach allem vns(er)m v(er)mügen helfen vnd beygesteen da
mit Sy bey Irem veterleichen erb landen vnd lewten beleiben vnd gehalten werden als wir vns des vormals auch
geneinander v(er)schriben haben Ausgenomen was vns der egenant vns(er) her der kunig darauf verschriben hiet
oder noch verschreiben wurde Desgeleichen hat vns vns(er) vorgenant(er) her der kunig auch gelobt vnd verhaissen
Ob das wer daz wir eeleich erben gewunnen daz Er In dann getrewleich vnd freuntleich nach allem seinem ver
mügen sol helfen vnd mechtikleich beygesteen damit Sy bey Iren landen vnd lewten beleiben vnd gehalten werd(e)n
an all argelist vnd geuerde Mit vrkund ditzs brieues Geben ze Prespurg an Suntag vor Sant Michels tag
Nach Cristi gebürde Vierzechenhundert iar vnd darnach in dem Ainen vndtzwainzigisten Jare