Wir Sigmund von gotes gnaden Romischer kunig zu allenczeiten merer des Richs vnd zu Hungern zu Beheim Dalmacien Croacien
(et)c(etera) kunig Bekennen vnd tun kunt offenbær mit disem brief Allen den die In sehen oder horen lesen Wann wir dem hochgebornen Albrech=
ten herzogen zu Osterreich (et)c(etera) vnserm lieben Sün vnd der durchluchten Elsbeten vnser lieben Tochter siner gemahel vnd Iren leibes
erben vnser furstentum vnd marggraffschaft zu Merhern mit allen herscheften Steten ertreichen gebieten dörffern clostern probst=
tien lanthe(rr)en manscheften Edeln Rittern knechten burgern bawren leibgedingen ackerleuten vnd zinsen die zu dem ertreich gehoren
festen grunden ackern gebawten vnd vngebawten bergen talen ebnen walden püschen waidachen wayden wisen gegeuden fogel=
geyden weyern teichen fischweiden weingarten wassern wasserleuffen mülen mit Bergwerken golt silber bley czeyn vnd aller
ander Bergwerke gewalten gebieten gerichten herscheften lantstewren ouch vff des Erewirdigen des Bischofs zu Olomucz vnsers fursten
vnd siner nachkomen gütern vnd ouch auff der andern lantherren vnd Inwoner des landes zu Merhern mit gulten Renten vbertzinsen
roboten fallen wandeln vnd mit allerley gericht gemeinlich vnd sunderlich lehenscheften der kirchen vnd ander gotes gaben vnd ouch mit
allen rechten eren wirdikeiten nuczen gewonheiten vnd mit allen andern zugehorungen wie die sunderlich geheissen oder genant
mügen werden nichts außgenomen als ein kunig zu Beheim gnediclich gegeben vnd gelihen haben als das ander vnser Maiestat
brief die wir In doruber gegeben haben eigentlich außwisen Des haben wir angesehen soliche liebe vnd trewe die vns der egen Al=
brecht herzog zu Osterreich vnd Elsbeth sine gemahel vnd Ire vorfaren vns vnd dem heiligen Riche oft vnd dick williclichen erzeigt
vnd getan haben teglichen tun vnd furbas tun mügen vnd sollen In kunftigen czeiten Vnd haben In dorumb mit wolbedachtem
mut gutem rat vnser vnd des heiligen Richs fursten herren vnd getrewen vnd rechter cwissen die egen gabung als wir den egen
Albrechten herzogen zu Osterreich Elsbethen siner gemahel vnd Iren leibeserben an dem furstentum vnd marggraffschaft zu Mer=
hern vnd allen vorgen zugehorungen als ein kunig zu Beheim getan haben nach laut vnser Maiestat brief daruber gegeben
als ein Romischer kunig gnediclichen bestetet beuestet vnd confirmiret besteten beuesten vnd confirmiren In die in craft diß
briefs von Romischer kuniglicher macht Also das soliche gabung alle nach laut vnsers Maiestat briefs daruber gegeben in sinen
puntten clauselen vnd artikelen volle craft vnd macht haben sollen gleicherweise als ob Sy von worte zu worte in disem briefe
begriffen wæren Mit vrkund diß briefs versigelt mit vnser kuniglichen Maiestat Insigel Geben zu Ofen Nach Crists geburt
vierczehenhundert Jare vnd dornach In dem dreyvndczweinczigsten Jare am nechsten Montage nach sant Michels tag Vnser
Richs des hungrischen (et)c(etera) In dem Sibenbnddreissigisten des Romischen In dem vierczehenden vnd des Behemischen In dem vierden
Jaren