Wir Sigmund von gotes gnaden Romischer kunig zu allen zeiten Merer des Reichs vnd zu Hungern zu Behem Dalmacien Croacien (et)c(etera) Kunig Bekennen vnd tun kunt offenbar mit
disem brieue allen den die In sehen oder horen lesen Als wir vorzeiten dem edeln puothen von Czastolowicz vnserm diener vnd lieben getreuen fur das Sloß Orlowicz in merhern gelegen
das wir Im fur ein Sum gelts verschriben hatten vnd das er vns zu sunderlichem danck vnd wolgeuallen ubergab vnd abtrat vnd auch vmb solich getreuw nutz vnd willig dienst die vns
derselb puotha langezeit getrulich getan hat vnd auch vmb seine koste vnd schaden die er in disen kriegen gen vnsern feinden vnd vngelaubigen Im lande zu Behem getragen vnd mit In gelite(n)
hat das alles vnser Rete mit Im abgerechent haben vnser Sloß Glac Stat vnd Burg mit dem Stetlin landeck vnd habelswerd mit der Stat vnd Sloß franckenstein vnd mit dem Stetlin
wunschelburg mit allen Iren zugehorungen zu prespurg fur ein Sum gelts Sechs tausent Schock Behemischer grossen gnediclich verschriben vnd verpfendet Vnd Im dornach Im Oldenzol
Sechs hundert Schock behemischer grossen fur die morgengab die wir Im zu des edeln Albrechts von Coldicz (et)c(etera) tochter seiner Gemahel gaben geslagen vnd verschriben Vnd Im aber dornach zu
Trencz durch berednuß des Erwirdigen Cardinals von olomucz vnd Albrechts Schencken von landsperg dreytausent Schock dorzu fur sein dienst vnd schaden geslagen hetten Also das die Sum al
le zusamen gerechent machen Newntausent Sechs hundert schock grossen Also hat vns der egenant puotha mit fleisse gebeten das wir Im durch besser sicherheit willen die Sum alle geruchten
in ein verschreibung zubringen Vnd drumb so haben wir dem egenan(ten) puothen vnd seinen erben mit wolbedachtem mute gutem Rat vnser fursten vnd mit willen Rat vnd wissen vnserr
landheren von Behem mitnamen der edeln Vlrichs von Rosenberg Wilhelms von hasemburg Jilbrechts von Coldicz Alssen von Sternberg anders von holicz hinken von Rotenberg Jarosla
wen von der duben Jan von Rusek vnd ander getruen vnser egen(ant) Sloß Glac Stat vnd Burg mit den Stetlin landeck vnd habelswerd das Closter Camencz mit der herschafft die wir doruff ha
ben von Rechts wegen vnd die Stat vnd Sloß Franckenstein Vnd mit dem Stetlin Wunschelburg mit allen Iren zugehorungen fur die vorgenant Sum Newntausent vnd Sechs hundert Schock
grossen gnediclich verschriben vnd verpfendet verschreiben vnd verpfenden In crafft diß brieffs Also das der vorgen(ant) puotha vnd sein erben die vorgen(ant)
herschafft Glacz Stat vnd haws habelswerd das Stetlin Franckenstein die Stat vnd haws das Stetlin landeck vnd das Stetlin wunschelburg mit allen herlicheiten zinsen Renten kirchlehen der
Gotzgabe aysmen anfehlen Renten nutzen zollen gerichten dorffern hofen eckern wisen weiden wassern wunnen mulen teichen pachen wasserleuffen welden puschen bergen talen vnd allen an
dern zugehorungen nichts außgenomen noch hindangesetzt das do leit in den obgenan(ten) herschafften des landes zu Glacz oder wo das leit vnd dorzu gehort vnd der gemessen Vnd gebruchen sollen
so dick vnd solang biß das wir Im oder seinen erben die vorgenant Sum gelts Newntausent vnd Sechs hundert Schock grossen gancz vnd gar bezalt oder Im genuge dorumb getan haben Vns
sol auch der vorgenant Puota oder sein erben doruff keinen vfflag oder schaden mer rechen Sunder wann wir oder vnser erben oder nachkomen kunige zu Behem Sy solicher lozunge vns zutestaten
erfordern so sollen sie sich des nicht widern sunder Sy sollen vns nach vnser ermanug in einem monad derselben lozung gestaten vnd Ie vorgen(ant) Sum gelts nemen vnd vns der vorgen(ant) herschafft mit
Iren zugehorungen vngeuerlich abtreten on alles widersprechen Wir behalten vns auch das die vorgen(ant) Stat vnd Sloß Glacz vnd franckenstein Stat vnd haws vnser offene Slossse sein sollen
zu vnser notdurfft das wir vnser Amptlut vnd volk dorein legen vnd vns drauß vnd wider dorein wider vnser feind behelffen mogen als offt vns das not geschiht vff vnser kost vnd zerung vnd
on Iren schaden vngeuerlich Auch vernichten wir alle ander verschreibung vnd brief die der vorgenant puotha von vns vormals vff Glac hat gehabt das die furbas kein crafft noch macht haben
sollen in kheinweis Sunder wollen das Im vnd seinen erben vnser Sloß vnd Stat zu Glac vnd franckenstein mit Iren zugehorungen nicht mer dann vmb die egen(ant) Newntausent vnd Sechs hundert schock
verhafft sein vnd steen sol Auch vernichten wir alle die brief die vnser Bruder kunig Wenczlaw seliger vnserm lieben Oheim herczog hansen von Ratibor seligen vber die egen(ant) herschaffte gegebn
hette die vns als wir die egen(ant) herschafft vmb vnser bereit gelt von dem egen(ant) herczog hansen losten vnd ouch dem egen(ant) puothen nicht ubergeben worden sind vnd wollen das die dem egen(ant) puothen vnd
seinen erben ob Sy ymer zulichte qwemen keinen schaden bringen sunder krafftlos vnd tot sein sollen Vnd wer disen brief mit des egen(ant) puothen vnd seiner erben guten willen Innehaben wirt dem gebn
wir fur vns vnser Erben vnd nachkomen kunige zu Behem mit crafft diß brieffs alle Recht dorzu zuhaben als der egen(ant) puotha selber mit vrkund diß brieffs versigelt mit vnser kunglichn ma
iestat Insigel Geben zu Nurenberg nach Cristi geburt vierczehenhundert Jar vnd dornach in dem Eynvnddreissigsten Jare an sant margrethen tag Vnser Reiche des vngrischen (et)c(etera) In
funffvndfierczigsten des Romischn Im Eynvndczweinczigsten vnd des Behemischen Im Eylfften Jaren