WIr Sigismund von gotes genaden Romischer keyser zu allentzeiten Merer des Reichs vnd zu Hungern zu Behem Dalmacien Croacien (et)c(etera) kunig Bekennen vnd tun kunt offenbar mit disem briefe Allen den die In sehen oder horent lesen Als der
Durchleuchtiger furste vnser lieber Bruder kunig Wenczlaw seliger Romischer vnd zu Behem kunig Durch nutz frumen vnd besters willen der Statt zur Sittaw eyn ordnunge vnd gesecz dem Rate vnd den Burgern vnd hantwergken in derselben Statt zur Sittaw gemacht hat Als dann das sein Maiestat
briefe daruber gegeben eygentlicher Innehalden Vnd nun ouch wemals der Edel Hinke Berke von der Duben genant von der leypen seliger zwischen dem Rate Burgern vnd gemeinden in der Statt zur Sittaw in namen vnd an stat des vorgenanten vnsers Bruders kunigs wenczlaw einen offspruch getan
hat den ouch derselb kunig wenczlaw in Einer Maiestatbrieue bestetigt hat als dann das sulcher bestetigung vnd usspruchs brieue hernach geschriben clarlicher Innehalden Also lautende Wir wenczlaw von gotes gnaden Romischer kunig zu allentzeiten Merer des Reichs vnd kunig zu
Behem Bekennen vnd tun kunt offenlich mit disem brieue Allen den die In sehen oder horen lesen Wann der Edel hinke Berke von der Duben genant von der leypen zur Syttaw Gorlicz Budissin lubaw laban Camentz vnd zu lusitz Houptman vnd voyte vnser lieber getruwer zwischen dem Rate
Burgern vnd der gantzen Gemeine der Statt zur Syttaw Vnsern lieben getruwen vmb alle zwytracht kriege stosse vnd vnwillen die zwischen In beyderseyte lange zeit geweret hant von vnser gewalt vnd macht wege die wir Im daruber mit vnsern brieuen hindurch gegeben haben einen offspruch
getan hat als das desselben hinken offspruch den er daruff mit seinem Anhangende(n) Insigel versigelt gegeben hat wol vswiset vnd also lawtet Wir Hinke Berke von der Duben genant von der leypen zur Syttaw Gorlicz Budissin lubaw laban Camentz vnd zu lusitz Houptman vnd voyte Bekenn(en)
en vnd tun kunt offenlichen Mit Disem Brieff Allen den die In sehen oder horen lesen Das wir von gewaltes macht geheises vnd beuelhens wegen des Allerdurchleuchtigisten fursten vnd herren hern wenczlaws Romisches kunigs zu allentzeiten merer des reichs vnd kunigs zu Behem
vnsers gnedigen herren sulche zwytracht kriege stosse vnd vnwillen die zwischen dem Rate an einem Vnd den Burgern vnd der Gemeyne der Statt zur Syttaw an dem andern teile langezeit geweret hant vnd gestanden seind zwischen beyden teilen abgetan hingelegt entscheden vnd sie
mit einander versunet vnd vereynet haben in solicher mase als vnser offspruch den wir daruf getan vnd gegeben haben der von worte zu worte hernach geschriben stet vswiset vnd Inheldet CUm Ersten so sprechen wir vß vnd scheiden das also Vnd seczen das also von vnsers gnedigen
herren des kunigs wegen das alle zwytracht kriege vnd Irunge die zwischen den egenanten Burgern vnd Inwonern der Statt Syttaw gewest sein ebie man die kriege oder zwytracht mit sunderlichen worten benennen mage nichtes ußgenomen es sie vnder In geschehen mit bescheczunge
mit geleczden oder tode mit anderley beswerunge der Statt Syttaw zu gute vnd vnserm gnedigen herren dem kunig zu hulffe vnd zu Stewr gegeben seind oder wem sie sulches schatczelt gegeben haben von der Statt wegen gantz vnd gare hingelegt solle sein keines ußgenomen vnd yr
keyner sol furbasmer den andern anreden noch verdenken noch fortmer nicht bereden mit affterkosen mit spotrede smeden noch sonnert mit keinen bosen worten vmb soliche vobenante sachen Als oben vnd nyden in disen Artigkeln geschriben steet Ouch sollen sie alle mit einander in
fruntschafft in liebe in guter handelunge siczen bey trewen vnd eren an arge Vnd an alles boses geuerde Vnd sullen yegliche geselschaft Iedirme die Statt Syttaw komen ist Durch der egenanten Statt notsache vnd gescheffte willen bisher doehme komen ist Vnd sunderlichen ouch alle sulche
schulde daruber man der Statt Syttaw brieue hat mit Irem Ingesigel zube durch der Statt ere vnd gelawben willen vnd ouch durch ander Stette glawben willen Vnd das liplich vnd gutlich mit einander bezalen vnd gelten one alle widerrede Also ferre als sie leibes vnd gutes vnd vnsers
gnedigen herren des Romischen vnd Behemischen kuniges swere vngnade vermeyden wollen vnd tyen in vnsern offspruch vnd scheydunge alle die doehme verdacht sint in der Statt oder vßwendig wie die benant seint sie sein Inwoner der Statt oder nit Item zum andern male
so sprechen wir uß von vnsers gnedigen herren des kunigs wegen Vnd begeren vnd wollen das also gehab(t) han das die Maiestatbriefe vnsers gnedigen herren des kunigs die er beyden teylen gegeben hat dauon sich etwas sulcher zwytracht vil verlauffen vnd erhaben hat dar
umb das yeglich teil das andere dem gemoder straffen wolde Wider geantwurt werden one alle widerrede vnserm herren dem kunige oder vns an seiner statt vnd sullen fortmer keine macht haben Item zum Dritten male So sprechen wir vß von vnsers gnedigen herren des
kunigs wegen das die Acht manne die we gekoren wurden vber den Rat gantz vnd gare abgetan sullen sein vnd furbasmer nymermer gekoren werden In deheyneweis Sunder diser Rate der yeczunt siczet vnd der Rate der hernach siczen wirdet in kunftigen zeiten sullen gantze macht hab(en)
vnd ein Rate sol dem andern rechnunge tun von Iren eldisten vnd von der Gemeyne vnd geswornen hantwerksmeistern als das in andern vmbgelegen Stetten Budissin vnd Gorlicz ist gewonheit vnd recht ist also das das nit tut Item zum vierden male so sprechen wir vß von vnsers gne
digen herren des kunigs wegen das alle vnd yegliche Hantwergke als wulweber fleisscher Sneyder Schuchter Smede Begker riemar die benennen mage Breyergen vnd kretzmer gemeinlichen des Iren sunderliche gewonheit vnd rechten bliben sullen vnd Inne haben sullen als dann
andern vnsers gnedigen herren des kunigs Stetten Budissin vnd Gorlicz ist gewonlich vnd Recht ist Vnd mitnamen das kein Hantwerkslewte furbasmer Byer brewen sullen zu schencken noch vß feilen kauff sunder allein zu Iren notdurfften zu trinken als in Budissin vnd in
Gorlicz gewonlich ist Sunder wer uß sich vßtzman vß den Hantwerken heruor geschickt hat zu brewen das mag er wol tun Vnd vß das andere Iare sol er es nymer tun sunder allein die Breyergen vnd kretzmer die sullen in Iren hewsern Byer Brewen vß feylem kauff vnd
schenken Ouch so sol furbasmer nymand von dem lande noch vß der Statt Inwendig der meyle fleisch noch Brot in die Stat zu feylem kauff furen zum Marktte wenne hie alleine die vßwendig vß dem lande eyner meyl siczen von rinden die mogen das wol tun Vnd were es sache
das sich die Breyergen vnd ouch die Hantwercke wider disen Rat oder einen andern Rat der in kunfftigen zeiten sein wirdet seczen wurden mit vnzinlichen sachen vnbillicher die weiten domitte sullen sie Ire vnnunge gebrochen haben Ouch sol der Rate der yeczunt siczet oder der in
kunfftigen zeiten siczen wirdet vß den kretzmern vnd vß den Breyergen Iren vier kiesen by dem Eyde das die Ire Innunge abgetan werden nach Rate des Rates der Statt Syttaw vnd eim Rate vnd kewise zu gute also wol als die andern Hantwergke tun sullen Item zum funfften male
So sprechen wir vß vnd scheiden das also von vnsers gnedigen herren des kunigs wegen Als euch seine kunigliche gnade begnadet hat mit der kure das ein Rate den andern kiesen sol das Ir furbasmer keine gebrechliche lewte in den Rate kyesen sullet durch mancherley sachen willen
der Statt zugute als ferre als Ir vnsers gnedigen herren des kunigs swere vngnade vermeyden wollet Item zum Sechstenmale So sprechen wir vß von vnsers gnedigen herren des kunigs wegen Vnd gebieten dem Burgermeister vnd den Ratmannen zur Syttaw die yeczunt sein
oder in kunftigen zeiten sein werden von vnsers gnedigen herren des kunigs wegen vnd ouch von vnsern wegen als eines foytes dem sulche sachen beuolhen sein das sie gemeinlich achtunge daruff haben sullen beyde in dem Rate vnd ouch in der Gemeyne vnd in hantwerken ob sich
yemand darwider seczen wolde mit freuel vnd vnsern offspruche vnd scheidunge vngehorsam sein wolde vnd mit worten oder wercken brechen wurde heimlich oder offenbar das sie den oder die sullen bestetigen vnd in die hafft brengen vnd das die leibes vnd gutes verfallen sullen sein
gen vnserm gnedigen herren dem kunige vnd den oder dieselben daruf mit macht lasen komen es geschee denne mit vnsers gnedigen herren des Romischen vnd Behemischen kunigs willen vnd mit vnserm willen als eins voytes oder wer ein voyte were vnd Im wirdet von
vnsers gnedigen herren des kunigs wegen sulche Ammbt in Beheln Item zum Sybenden male so seczen wir vnd scheiden das vnd sprechen das also uß von vnsers gnedigen herren des kunigs wegen das alle ladunge vnd alle verbungunge die zwischen den egenanten Burgern
vnd Inwonern zur Syttaw geschehen seind wie oder wo von sich die entpundet haben das die sullen abgetan sein vnd hingelegt vnd furbasmer kein crafft haben es sie geystlich oder weltliche sache vnd zu vrkunt der egenanten offspruch haben wir obgenan hinke vnser Ingesigel
an disen gegenwurtigen vnsern briefe mit vnserm gutem wissen vnd willen lassen hengken Der geben ist zur Syttaw Nach Cristi geburt Tausent vierhundert vnd in dem Sechzechenden Iare des Mitwochs nach sant Andrees tag des heiligen zwelff botten Vnd uff das das der egen offspruch von dem
Rate den Burgern vnd der Gemeine derselben vnser Statt zur Sittaw vorter vnuerruckt gehalten werde vnd sich zwischen In furbasmer kein zwytracht kriege stosse noch vnwillen erhaben oder entsteen So haben wir mit wolbedachtem mute vnser fursten herren Edeln vnd getruwen den egen
offspruch als er davor von worte zu worte eygentlich geschriben steet gnediglich bestetet baufest vnd confirmiret bestetigen beuesten vnd confirmieren in denn crafft dis briefs vnd kuniglicher zu Behem vnd meynen seczen vnd wollen das derselb offspruch in allen seinen Stucken Artigkeln
meynunge vnd begriffen gantz stete vnd vnuerruckt bleiben vnd nu vnd furbasmer ewiglich von dem Rate Burgern vnd der Gemeine der egen vnser Statt zur Syttaw die nu sein oder in zeiten sein werden on alles widersprechen gehalten werden solle Vnd gebieten darumb dem Burgermeister
Rate vnd Burgern gemeinlich der egent vnser Statt Syttaw vnd allen Iren nachkomen vnsern lieben getruwen ernstlich vnd vestiglich mit disem briefe das sie den egenen offspruch vnuerruckt halden vnd dem nicht uberfaren in dehein weis Vnd wurde sich yemand vnder In darwider freuelichen seczen
oder tun mit worten oder mit wercken da sol vns mit leibe vnd gute verfallen sein vnd wollen In ouch darzu also straffen vnd bessen lassen das er In andern zeiten vnserm kuniglichen gebote nicht widersprechen wirdet als das wol billich ist Vrkunth dis briefs Versigelt mit vnser
kuniglichen Maiestat Insigel Geben zu prage Nach Cristi geburt vierzechenhundert Iare Vnd darnach in dem Sybenzechenden Iare des nechstes Swnabens vor dem Sontage Vocem Iocunditatis Vnser Reiche des Behemischen in dem vier vnd funffczigsten Vnd des Romischen
in dem Eyn vnd vierczigsten Iaren Vnd uff das nu hinfur zwischen vnsern vorgenanten getruwen dem Rate Burgern Hantwerken vnd Gemeynden der Statt zur Syttaw keine mishellung Spenne kriege oder zwytracht in kunfftigen zeiten sich erhaben oder uffsteen Sunder das sie mit ein
ander gutlichen mit liebe vnd in ordnunge leben vnd bleiben darczu sie vnd dieselbe Statt fridlich vnd gehutlichen wachsen vnd zunemen Vnd die vorgeschriben gesecz ordnunge vnd usspruch vnuerruckt gehalten werden Darumb mit wolbedachtem mute gutem Rate Vnser fursten
Edeln vnd getruwen Haben wir die vorgeschriben briefe als die von worte zu worte vorgeschriben steet vnd ouch die vobenante ordnunge vnd gesecz kunigs wenczlaws vnd her hinke desselben Statt daruber gegeben gnediglich bestetigt beuestent vnd Confirmiret Bestetigen beuestnen
vnd Confirmieren In die in crafft dis briefs vnd kuniglicher macht zu Behem Vnd wir meynen seczen vnd wollen Vnd gebieten ouch darumb den Burgermeistern Rate vnd Burgern gemeinlich der vorgen vnser Statt zur Syttaw die yeczund seind vnd in kunfftigen zeiten sein
werden ernstlich vnd vestiglich mit disem briefe bey vnsern hulden vnd by der pene in den obgeschriben briefen begriffen das sy vnd Ir yeglicher die vobenante Ordnunge gesetze vnd usspruch vnuerruckt halden vnd die nicht uberfaren noch darwider tun in deheinerley weyse
als lieb einem yeglichen die swere pene die in den selben vorgeschriben briefen berurt sind sey zuuermeyden Mit vrkund dis briefs Versigelt mit vnsere keyserlichen Maiestat Insigel Geben zu prage Nach Cristi geburt vierzechenhundert Iar Vnd darnach in dem Syben
vnd dreissigsten Iare Am nechsten Montag vor sant Benedicten tag Vnsere Reiche des hungrischen in dem funffczigsten des Romischen im Syben vnd zweintczigsten des Behemischen im Sybenzegenden Vnd des keysertumbs im vierden Iaren