Ich Erkinger herre zu Swartzenberg vnd von Sallenßheim Bekenne vnd thun kunt offenlichen
mit disem briue gen allermenniclichen / als ich bißhere In anspruch vnd vorderung gewest bin
gen dem allerdurchleuchtigisten Großmechtigisten fursten vnd herren hern Sigmund Romischen
keyser zu allenzeiten merer des Reichs vnd zu Vngern In Behemen (et)c(etera) kunig meim allergnedigisten
herren / vmb ein merkliche Sum(m) geldes do fur mir sein gnade etlich sloß vnd stete Im kunigreich zu
Behem vffigeben hette / Auch von meiner dinst wegen als mir dann sein gnade Ierlich funffhundert
guldein fur mein dinst zu geben vffigeben gewest ist / Vnd vmb die scheden die Ich vnd mein diener
bißhere In seinem dinst enpfangen haben / Also hat mich sein keyserliche maiestat solicher schulde
vnd vorderunge berichtt an enden daran mich wol genůgt / Vnd Ich han seinen gnaden darauff alle
haubtbriue die Ich vber soliche pfant vorderunge schulde vnd scheden bißhere von seinen gnaden
gehabt han mit willen vbergeben / Vnd sage auch dorauf sein keyserliche maiestat vnd alle seine
Nachkomen am Reich vnd die Cron zu Behem fur mich vnd alle mein erben solicher pfande
Anspruche schulde scheden vnd vorderunge die Ich zu seinen keyserlichen gnaden biß uf disen
heutigen tag datu(m) ditz briefs gehabt han gentzlichen quit ledig vnd loeß In crafft ditzs briefs
das die gantz ab sein sullen on alles geuerde / Zu vrkunde so han Ich mein Infigel an disen briue
gehangen / Vnd In merer sicherheit / So han Ich homan herre zu Swartzenberg mein Infigel
zu des gnten meines liben hern vnd vaters Infigel auch an disen briue gehangen Der geben
ist Nach Cristi vnsers hern geburt viertzehenhundert Jare vnd darnach In dem Sibenund =
dreissigisten Jare am freytag nest nach vnser libenfrawentag Zu latein Natiuitatis genant